Vivo X90 Pro+ - Snapdragon 8 Gen2 чипли янги камерафон

Vivo X90 Pro+ - Snapdragon 8 Gen2 чипли янги камерафон

Vivo компанияси X90 Pro+ смартфонини тақдим этди. Компания ушбу қурилмани “Бир дюймли камера сенсорларининг қироли“ деб атади. Смартфон Sony'нинг IMX989 сенсорига эга бўлган биринчи қурилма эмас, аммо бошқа гаджетлардан ажралиб туриш мақсадида Vivo сенсорга бир неча ўзгартиришлар киритди.

Биринчи камера линзаларидан бошлаймиз. Линза юқори сифатли шишадан ишланган бўлиб, пластик линзага қараганда у камроқ ёруғлик дисперциясига учрайди. Шунингдек, Ziess T* формуласи расмнинг оқариб кетиши ёки хира бўлиб қолишини олдини олади.

Линза диафрагмаси f/1.75 бўлиб, у янада кўпроқ ёруғликни ўтказа олади. Катта бир дюймли IMX989 сенсорини X80 Pro'нинг 1/1,3 дюймли сенсори билан солиштирганда 77% каттароқ фотосенситив майдонга эга. 

X90 Pro+ иккита телефото камера билан жиҳозланган. Биринчиси 64 мегапикселли перископ линза бўлиб, у билан 3.5х оптик ва 100х рақамли зумга эришиш мумкин. Бундан ташқари, 2х оптик зумдаги яна битта 50 мегапикселли иккинчи телефото камера ҳам бор. Юқоридаги барча учта камерада ҳам оптик стабилизация мавжуд.

Ультракенг камера сифатида қурилмага 114° кўриш майдонига эга бўлган 48МП IMX598 сенсори ўрнатилган. Олд томонда эса 32МП селфи камера жойлашган. Самртфон 8K 30 кадрда видеога олиши мумкин. Шунингдек, Dolby Vision ҳамда LOG форматларда 10 кадр/сонияда видео олса бўлади. 

Камера X90 Pro+ моделининг ягона энг кучли томони эмас. Қурилма Qualcomm компаниясининг энг кучли Snapdragon 8 Gen2 чипи билан жиҳозланган. Чип 12ГБ тезкор ҳамда 256/512ГБ UFS 4.0 доимий хотираси билан бирлаштирилган. Унумдорлик даражасини бир маромда ушлаб туриш мақсадида чипсет устига 8,900 мм² совутиш қопламаси ўрнатилинган. 

Смартфон 1,440 х 3,200 пиксел резолюциядаги 6.78 дюймли дисплей билан жиҳозланган. Бу LTPO 4 AMOLED дисплей бўлиб, унинг икки чети ён томонга қайрилган бўлади. Дисплейнинг максимал ёрқинлик даражаси 1800 нит бўлиб, у Dolby Vision функцияси ҳамда 120 гертс янгиланиш частотасини қўллаб-қувватлайди. 

Қурилма қора ва қизил рангларда тақдим этилган. Иккала рангдаги моделнинг орқа томони сунъий чарм билан қопланган. Смартфон сув ва чангдан ҳимоя IP68 стандартига эга. Унинг корпуси нисбатан қалинроқ - 9.7 миллиметр. Оғирлиги 221 грамм бўлса-да, бу iPhone 14 Pro Max'дан енгилроқ дегани. 

Гаджет икки қисмга ажралган 4,700 мАс сиғимли аккумулятор билан жиҳозланган. Уни 80 ваттда симли, 50 ваттда симсиз қуввлаш мумкин. Симли қувватлашда смартфон 33 дақиқада тўлиқ қувватланади. 

Vivo X90 Pro+ смартфони фақат Хитой бозори учун тақдим этилди. Қурилма 28 ноябрь санасида сотувга чиқади. Ҳозирча смартфоннинг халқаро бозорга сотувга чиқиши номаълум бўлиб қолмоқда. 

Қурилманинг Хитойдаги нархи эса қуйидагича:

12/256ГБ - 910 доллар

12/512ГБ - 980 доллар.

ЎҚИНГ: Galaxy А23 янги хусусият билан тақдим қилинди! 

Сайт янгиликларидан доимий хабардор бўлиш учун Телеграм каналимизга қўшилинг!