Windows 10 Creators Update муаммоларини ҳал этамиз
Windows 10 тизими учун Creators Update янгиланишини аллақачон компьютерларга ўрнатиш мумкин. Агар уни ўрнатганингиздан сўнг тизимда хатоликлар кузатилаётган бўлса, уларни тузатишнинг учта йўлини тавсия этамиз.
1-усул: ўзи ёрдам беради
Қарашингиз керак бўлган биринчи жой – тизим созламаларидаги «Нуқсонларни бартараф этиш» деб номланган янги бўлимдир. Унга қуйидаги йўлдан кирилади: «Параметры» → «Обновление и безопасность» → «Устранение неполадок».
Бу ерда операцион тизим фаолиятидаги барча асосий камчиликлар санаб ўтилган ва уларни бартараф этиш учун керакли жиҳозлар тақдим этилган. Бу одатда, бир нечта қадамдан иборат ҳаракатларни ўргатиб турувчи «электрон уста»лар бўлади. Кўпинча хатоликларни тўғрилаш учун шу усулнинг ўзи етарли бўлади.
2-усул: тезкор янгилаш
Иккинчиси – нисбатан «қаттиқроқ» усул. Windows 10 Creators Update’да «Бошқатдан бошлаш» («Начать заново») номли янги функция пайдо бўлган. Уни «Windows ҳимоячисининг хавфсизлик маркази» – «Центр безопасности защитника Windows» дастуридан топасиз.
Моҳиятига кўра, бу – сизнинг шахсий маълумотларингизни ҳамда сукут бўйича ўрнатилган дастурларни сақлаган ҳолда операцион тизимни тезкорлик билан қайта ўрнатишдир.
Бунда Windows’ни қайта ўрнатиш жараёни автоматик режимда кечади. Натижада эса сиз мутлақо топ-тоза, фаоллаштирилган, буткул янгиланган операцион тизимга эга бўласиз; унда барча керакли файлларингиз ўз жойида сақланиб турган бўлади. Мазкур жараён камида 20 дақиқа давом этади, қанчалик узоқ чўзилиши эса компьютерингизнинг қувватига боғлиқ.
3-усул: орқага қайтарамиз
Охирги усул – барибир тизимдаги хатоликлардан халос бўла олмаган ва олдинги Windows версиясига қайтишга қарор қилган фойдаланувчилар учун. Бу функция сизга аввалги версиялар орқали яхши таниш бўлиб, Windows 10 Creators Update’да ҳам унга бирор ўзгариш киритилмаган.
Хулласи калом, Windows 10 Creators Update’ни ўчириб ташламоқчи бўлсангиз, у ҳолда тизимни «Қайта тиклаш» бўлимига борасиз, у қуйидаги манзилда жойлашган: «Параметры» → «Обновление и безопасность» → «Восстановление». Бу ерда тизимни ортга – аввалги ҳолатига қайтариш функцияси жойлашган.
