Windows 10’даги махфий Mixed Reality функциясини фаоллаштирамиз
Аввалги хабар ва мақолаларимизда виртуал борлиқ (виртуал реаллик – VR), тўлдирилган реаллик, панорамали 360-видео кабилар ҳақида маълумотлар берганмиз. Буларга қизиқувчилар энди шуларга ўхшаш – аралаш реаллик имкониятларини Windows 10 тизимидаёқ синаб кўришлари мумкин бўлди!
Microsoft компанияси аллақачондан бери аралаш борлиқ (Mixed Reality) соҳасида ишлар олиб бораётган эди. Бу ҳақда шу пайтгача компаниянинг тақдимотларида намойиш этилган чиройли видеороликлар ва слайдлар орқали кам-камдан гувоҳ бўлиб келаётган эдик. Энди эса мазкур қизиқарли виртуал оламни «ўз қўлларимиз билан пайпаслаб» кўришимиз имконияти туғилди.
Windows’нинг яқинда чиққан Creators Update янгиланишида Mixed Reality’ни фаоллаштириш учун керакли ҳамма нарса бор. Бироқ сукут бўйича бу функциялар яшириб қўйилган.
Ҳечқиси йўқ, яширин имкониятларга қизиқувчилар учун мазкур функцияларни фаоллаштириш сирларини баҳам кўрамиз:
- Windows параметрларининг созламаларини очинг.
- Янгиланиш ва хавфсизликни англатувчи «Обновление и безопасность» бўлимига киринг. У ерда дастурчиларга мўлжалланган «Для разработчиков» варақасига ўтинг ва «Режим разработчика» бандини белгиланг.
- Амалга оширилган ўзгартиришларга розилигингизни тасдиқланг.
- Windows 10 қидирув сатрини очинг ва Mixed Reality сўровини киритинг.
- Mixed Reality Portal иловасини ишга туширинг. Биринчи очилишида у керакли файлларни интернетдан юклаб олади, шу боис озроқ кутишга тўғри келади.
- Бошланғич экраннинг пастки чап бурчагидаги Set up simulation (for developers) тугмачасини босинг. Қалқиб чиққан ойнада ўз танловингизни тасдиқланг.
- Энди Mixed Reality Portal иловаси ишга тушиши керак. Аммо ҳали уни симуляция режимига ўтказиш зарур бўлади, чунки, виртуал борлиқ учун тўлақонли шлем сизда бўлмаса керак. Бунинг учун эса пастки чап бурчакдаги, отвёртка сурати туширилган тугмачани босинг ва илованинг созламаларини очинг.
- Очилган панелда Simulation ўчириб-ёқиш тугмачасини фаоллаштиринг.
Шундан кейин Mixed Reality Portal иловаси сизга Windows 10’нинг виртуал интерфейсини кўрсатади. У қандайдир коттежнинг ички ҳовлисига ўхшаб кетади. Унинг марказида – шундоққина ҳавода муаллақ ҳолда асосий меню турибди. У орқали дастурларни, масалан – браузер, суратларни кўриш иловаси, иловалар дўкони кабиларни ишга тушириш мумкин.
Атрофни томоша қилиш учун курсор (юқорига, пастга, чапга, ўнгга) клавишларидан, виртуал хоналар бўйлаб ҳаракатланиш учун эса WASD-клавишлардан (клавиатурадаги шу ҳарфлар жойлашган тугмачалардан) фойдаланинг. Тўғри, бошқариш ноқулай, аммо унутманг, бу барибир симулятор, ахир. Тасвирнинг сифати ва ҳаракатлар тезкорлиги кўп ҳолларда компьютернинг, айниқса видеокартанинг имкониятларига боғлиқ.
Агарда аралаш борлиқ функциясини ўз компьютерингиздан ўчиришни истаб қолсангиз, у ҳолда тизим параметрларини очинг. Бу ерда янги – ўзимизга керакли «Смешанная реальность» бўлимига кўзингиз тушади. Айнан шу ерда Windows Mixed Reality’ни ўчириш тугмачаси жойлашган.
Сизга Windows хоналари бўйлаб ёқимли саёҳат тилаймиз!
