Windows 10 операцион тизими 29 июлдан пуллик бўлади
Microsoft компаниясининг маълум қилишича, ҳозирги вақтда Windows 10 операцион тизими остида 300 миллионга яқин қурилма фаол ишлаб турибди. “Droider.ru”нинг ёзишича, тизим бир йилдан камроқ вақт ичида мазкур натижага эришишга муваффақ бўлди.
Афтидан, шу сабабли ҳам Microsoft операцион тизимни энг сўнгги версияга қадар бепул янгилаб олиш амалиётини тўхтатмоқчи. Хабар беришларича, 29 июлдан бошлаб Windows 10 операцион тизимини расман, қонуний йўл билан ўрнатиш 119 долларга тушади.
“Агар бирор бир сабаб билан ҳали ҳам “ўнинчи версия”ни юклаб олмаган бўлсангиз, шошилинг — 29 июлдан бошлаб операцион тизим пуллик бўлади”, — деди Microsoft’нинг маркетинг ва стратегия бўйича вице-президенти Юсуф Маҳдий.
Қайд этишларича, Microsoft кейинги икки йил ичида Windows 10 фойдаланувчилари базасини икки миллиард фаол қурилмагача оширишни режалаштирмоқда.
