Windows 10’да исталган шаклда скриншот олишнинг учта осон усули
Деярли барча фойдаланувчиларда компьютер ёки ноутбук экранидан скриншот олиш учун зарурат бўлиб туради. Бирор матнга безак сифатида қўшиш учун, техник қўллаб-қувватлаш марказига юбориладиган хатга киритиш учун ва ҳоказо.
ЎҚИНГ: iPhone’да яхлит саҳифанинг узун скриншоти қандай олинади?
Қуйида сизга Windows 10 тизимли қурилмаларда турли скриншотлар қилишнинг учта осон усулини кўрсатиб берамиз. Булардан биринчиси кўпчиликка маълум бўлса-да, янги имкониятларини кашф этамиз; иккинчи ва учинчиси ҳатто қийшиқ шаклларда ҳам экран расмини олиш имконини беради. Бунинг учун қўшимча дастурларнинг ҳам кераги йўқ – керакли функциялар тизимнинг ўзида бор.
- «Print Screen» тугмачаси
Бу тугмача исталган клавиатурада бор, фақат жойлашуви сал фарқланиши мумкин. Шунингдек, тугмачада унинг номи турли шаклларда қисқартирилган шаклда ёзилади: PrntScrn, PrtScn, PrtScr ёки PrtSc.
Бу тугмачани босганда экраннинг айни сониядаги ҳолати расмга туширилиб, алмаштирув буферига олинади. Кейин эса уни тасвирлар билан ишлашни қўллаб-қувватловчи ҳар қандай дастурга, масалан, Word ва Paint кабиларга ҳам Ctrl + V тугмачалар комбинацияси орқали жойлаш мумкин.
Айни шу тугмачанинг яна бир имконияти мавжудлигини кўпчилик билмаса керак. Агарда унинг ўзини эмас, балки Alt + Print Screen тугмачалар комбинациясини боссангиз, бутун экрандан эмас, балки айни пайтда фаол бўлиб турган дастур ойнасидан скриншот олинади.
ЎҚИНГ: Android, iOS ва Windows Phone’да скриншот қилиш
- «Қайчи» – «Ножницы» дастури
Windows 10 операцион тизимида айнан скриншотлар билан ишлаш учун жорий этилган махсус «Ножницы» иловаси ҳам бор. Уни номи орқали излаб чақириш мумкин.
«Қайчи» экраннинг исталган жойидан, хоҳлаган шаклда тасвир олиш имконини тақдим этади. Бундан ташқари, бу дастур ёрдамида скриншотни файлга сақлаш ва кейин таҳрирлаш ҳам мумкин.
ЎҚИНГ: Chrome’да яхлит саҳифадан скриншот олиш
- «Snip & Sketch» дастури
Windows’нинг яна битта стандарт дастури; русчада номи бирмунча узун – «Набросок на фрагменте экрана» бўлса-да, фойдасиям ундан қолишмайди. Унинг имкониятлари «Қайчи»никидан анча кенг: экраннинг ҳар қандай жойидан ўзингиз истаган шаклда расм ола биласиз. Кейин эса якуний тасвирни қирқиш, маркер, ручка ёки қалам билан белгилар қўйиш/ёзиш мумкин.
Ушбу дастурни ҳам «Snip & Sketch» номи орқали қидириб ёки Win + Shift + S тугмачалар комбинациясини босиб чақириш мумкин. Иккинчи усулида кичкина жиҳозлар панели чиқади, унинг ёрдамида исталган шаклда скриншот қилингач, алмашув буферига олинади.
Хўш, синаб кўрасизми?
ЎҚИНГ: Рухсат берилмайдиган жойларда ҳам скриншот олиш йўллари бор!
