Windows 11 операцион тизимига янги функциялар ва рекламалар қўшилмоқда – билишингиз керак бўлган барчаси!

Microsoft компанияси ўзининг Windows 11 операцион тизими учун бир қанча янги функциялар билан бирга рекламаларни ҳам синовдан ўтказмоқда. Ўзгаришлар операцион тизимнинг инсайдерлар учун махсус 23435 (Dev Channel) версия билан эълон қилинган.

File Explorer'да галарея

Windows 11 Insider Preview Build 23435 (Dev Channel) версиясидаги энг эътиборли ўзгаришлардан бири бу File Explorer'га Gallery, яъни "галарея" кўринишининг қўшилишидир. Мазкур янги функция сизга File Explorer'да суратларингизни осонроқ кўриш имконини беради.

Галареяда сиз компютерингиздаги барча суратларни бир жойда кўришингиз мумкин, гарчи улар турли папкаларда жойлашган бўлса ҳам. Шунингдек, сиз қайси папкалардаги суратлар кўрсатилишини, қайсиларидагиси эса кўрсатилмаслиги кераклигини созлай оласиз. Маълум бўлишича, агар сиз OneDrive Camera Roll Backup (суратларингизни OneDrive'га юклаш) функциясини смартфонингизда ёқиб қўйган бўлсангиз ва Windows 11 компютерингизда ҳам ўша OneDrive аккаунтингиздан фойдалансангиз, сиз телефонингизда яқинда олган суратлар ҳам компютерингиздаги галареянинг энг юқорисида автоматик тарзда пайдо бўлади.

Қолаверса, галареядан бирон-бир платформага (Paint, PowerPoint ёки бошқалар) сурат киритиш учун уларни танлаш вақтида фойдаланишингиз мумкин.

Start (Пуск) менюсида рекламалар

Microsoft ўзининг бошқа хизматларини рекламаларини Windows 11 га "тиқиштириш"да давом этади – Windows 11 Insider Preview Build 23435 (Dev Channel) версиясида операцион тизимдан локал аккаунт билан фойдаланаётганлар Start (Пуск) менюсида Microsoft аккаунт (MSA) "реклама"ларини кўришлари мумкин.

Компания ушбу ўзгаришлар нормал эканлигини ва улар фойдаланувчилар фикр-мулоҳазаларини билиш учун синовдан ўтказилаётганини таъкидлайди ёхуд рекламалар барқарор версиягача етиб бормаслиги ва бекор қилиши ҳам мумкин.

Presence sensing функцияси

Windows 11 Insider Preview Build 23435 (Dev Channel) билан Microsoft янги "Presence sensing" (ўзбекчада - "мавжудлик, борликни сезиш") номли янги функцияни тақдим қилди. У сизни компютер олдидамисиз ёки узоқроқда, аниқлайди ва компютер ёнида бўлмасангиз уни автоматик равишда қулфлайди.

Албатта, ушбу функция фақат уни қўллаб-қувватлайдиган сенсорлар билан таъминланган қурилмаларда (ҳозирги кўплаб ноутбукларда бу нарса бор) ишлайди холос.

Илова ишлаб чиқувчилари ҳам Microsoft'нинг ушбу функциясидан, аниқроғи унинг API'дан ўз иловаларига "мавжудлик ҳақидаги маълумот"ни ўқишни сўрашлари мумкин бўлади. Бу эса сиз узоқроқдалингингизда иловаларга ўз-ўзини қулфлаш имконини беради. Бунинг учун сиз иловаларга "мавжудликни сезиш"га кириш учун Созламалар менюсидан рухсат берган бўлишингиз керак.

Ушбу ўзгаришлар бир неча ойлик босқичма-босқич синовлардан сўнг барқарор Windows 11 версияси кўринишида барчага тарқатилади.