Windows ва MacOSда уланган Wi-Fi паролларини топиш

Windows ва MacOSда уланган Wi-Fi паролларини топиш

Wi-Fi паролларингиз Маc ва Windowsда яширинган. Агар сиз компютерингизда Wi-Fiга уланган бўлсангиз, парол компютерингиз хотирасида сақланади. Қуйида уларни қандай топиш мумкинлигини кўриб чиқамиз.

Wi-Fi ҳаётимизга кириб келганига ҳам кўп бўлди. Уйда, ишда, ўқишда турли ҳил Wi-Fi тармоқларига уланамиз. Бироқ, ҳар доим ҳам паролларни эслаб қололмаймиз. Компютерни алмаштирганда ёки операцион тизимни ўзгартирганда Wi-Fi тармоққа янгидан уланишга тўғри келади. Кўп ҳолларда парол эсда қолмайди. Гарчи унга уланган бўлсак-да, кўпчилигимиз уни топа олмаймиз. Ушбу мақолада уланган Wi-Fi паролини ҳеч қандай қийинчиликсиз топиш йўлини ўрганамиз.

Windows ёки MacOSдан фойдаланар экансиз, уланган тармоқ пароллари тизим созламаларида сақланади. Эсдан чиққан паролни бошқалар билан баҳам кўриш муаммо эмас.

Қандай қилиб унутилган Wi-Fi паролини топса бўлади?

MacOSда сиз киритган ва сақлаган ҳар бир парол MacOS учун паролларни бошқариш тизими Keychain Accessда сақланади. Ва бу Wi-Fi тармоғи паролларини ҳам ўз ичига олади.

Keychain Access иловасини очиш учун қидирув функсиясидан фойдаланинг ва қуйидагиларни бажаринг:

  1. Keychain Access иловасидаги System Keychains бўлимидаги System тугмаси устига босинг;
  2. Тепадаги панелда жойлашган Passwords бўлимига киринг;
  3. Паролини билмоқчи бўлган Wi-Fi тармоғи номи устига икки марта босинг;
  4. Очилган ойнанинг паст қисмидаги Show password чекбокси устига босинг.
Keychain Access орқали паролни топиш

Чекбокс устига босилгандан сўнг парол кўринади, уни нусхалаб олиш мумкин.

Windowsда сал кўпроқ амал бажарилади, бироқ парол топишга арзийди:

  1. Бошлаш(Start) менюсидан Бошқарув панели(Control Panel)га ўтинг>Network and Internet>Network and sharing center(Windows 11да) ёки Созламалар>Network&Internet>Status>Network and sharing center(Windows 10да)га ўтинг;
  2. Connections ёзувининг ўнг томонида мовий рангда турган Wi-Fi тармоғингиз номи устига босинг;
  3. Очилган ойнадан Wireless properties бўлимига ўтинг ва янги очилган ойна тепасидаги Security бўлимига киринг;
  4. Ва ниҳоят, Show characters чекбоксини ёқинг ва парол кўринади. Windowsда ҳам паролни нусхалаш имкони бор.
Network sharing center орқали Windowsда уланган Wi-Fi тармоқ паролини топиш

Айтганча, Windowsда уланган тармоқларнинг ҳаммасини паролини биттада кўришнинг бошқача усули ҳам бор. Бунинг учун Windows CMDда озгина код ёзиш керак бўлади:

  1. Бошлаш+R тугмалар комбинациясини босинг;
  2. Очилган Run ойнасидаги матн киритиш бўшлиғига cmd деб ёзинг ва ОК тугмасини босинг;
  3. Очилган терминалда netsh wlan show profile деб ёзинг ва Enter тугмасини босинг;
  4. Ўзингизга керак бўлган тармоқ номини билгач, netsh wlan show profile "(Wi-Fi тармоғи номи)" key=clear деб ёзинг(Масалан, netsh wlan show profile "BepulWifi" key clear) ва Enter тугмасини босинг ва Windows сизга Wi-Fi паролини "беради".

Муаллиф: Ҳидоятхон Атабаев

ЎҚИНГ: ChatGPTни муаллиф сифатида кўрсатиб бўлмайди

Сайт янгиликларидан доимий хабардор бўлиш учун Телеграм каналимизга қўшилинг!