Windows Vista`ни қўллаб-қувватлаш бир йилдан кейин тўхтатилади
Бир йилдан сўнг, 2017 йилнинг 11 апрелидан Windows Vista операцион тизимини кенгайтирилган қўллаб-қувватлаш тўхтатилади. Бу ҳақда Microsoft корпорацияси сайтида хабар қилинди.
Эслатиб ўтамиз, Microsoft маҳсулотини тақдим этганганидан сўнг беш йил ёки унинг навбатдаги талқини чиққанидан икки йилдан кейин уни асосий қўллаб-қувватлашни тўхтатади. Бу вақт мобайнида хавфсизликни таъминлаш ва камчиликларни бартараф этишни ўз ичига олган янгиланиш (обновления)лар мижозларга бепул тақдим этилади.
Асосий қўллаб-қувватлаш якунига етганидан сўнг кенгайтирилган кўмак фазаси ишга тушади. У ҳам беш йил давом этиб, бу пайтда хавфсизликни таъминлаш ёрдами бепул, носозликлар билан ишлаш кўмаги эса пулли тарзда тақдим этилади. Бундан ташқари, кенгайтирилган кўмак босқичида Microsoft дизайнни ўзгартириш ва янги имкониятлар бўйича мурожаатларни қабул қилмайди.
Windows Vista платформаси 2007 йилнинг январида барча учун фойдаланишга очилган эди. 2010 йилнинг октябрида эса чакана савдода мазкур платформа савдоси тўхтатилди. Бир йил ўтиб компьютерларга ўрнатиш кўринишида тақдим этиш ҳам бекор қилинди. Windows Vista`нинг асосий қўллаб-қувватланишига 2012 йил апрелида чек қўйилди.
Net Applications маълумотларига кўра, жорий йилда Windows Vista операцион тизими фақатгина 1,4 фоиз шахсий компьютерларга ўрнатилган. Солиштириш учун: Windows 7 бозорнинг 51,9 % улушини эгаллаган бўлса, Windows 10 — 14,2 %.
