Хакерлар iOS 12 ўрнатилган iPhone X ҳимоясини ҳам аллақачон буза олишди! (+видео)

Apple ўзининг мобил операцион тизими мустаҳкам ҳимояга эга эканлиги билан фахрланади. Аммо хакерлар ҳатто iOS ҳимоясини ҳам бузиб – унинг учун жейлбрейк тайёрлаб келишади.

ЎҚИНГ: iOS 11’да жейлбрейк қилишни ўрганамиз

Яқинда расман намойиш этилган iOS 12 тизим талқини шу йилнинг кузида барча фойдаланувчилар учун тақдим этилиши кутилаётир. Айни шу пайтгача хакерлар унинг учун ҳам жейлбрейкни тайёрлаб, тарқатишлари эҳтимоли юқори.

KeenLab хакерлар гуруҳи аъзоси Хакер Лианг Ченг куни кеча эълон қилган видеолавҳада ушбу тизим талқинининг биринчи бета-версиясида ишлаётган iPhone X муҳофазаси бузиб кирилганлиги акс эттирилган. Ченг унда дастлаб мазкур суперфлагманга чиндан ҳам энг сўнгги – iOS 12 операцион тизимида ишлаётганлигини намойиш этади. Кейин эса KeenLab иловасини ишга тушириб, айфон ҳимоясини бузади. Бунда бирйўла смартфонга норасмий иловалар дўкони – Cydia ҳам ўрнатилади.

Мана, ушбу жараённи бирга томоша қиламиз:

Айтиш керакки, бу – яп-янги iOS 12 учун тайёрланган илк жейлбрейкдир. Бу ўринда мазкур янгиланишни хакерлар бунчалик тезда буза олганлари алоҳида эътиборга лойиқ.

Тўғри, ҳимоядаги мазкур «тирқиш»ни топиб, кейинги жамланмаларда ёки iOS 12’нинг тўлақонли тақдимотида беркитиш учун Apple’да бир неча ой вақт бор. Аммо унгача хакерлар ҳам қўл қовуштириб ўтиришмаса керак...

ЎҚИНГ: Тошкентлик хакер банкни салкам 90 минг долларга «чув туширди»