Харидорлар Galaxy S8’даги носозликдан шикоят қила бошлашди
7 апрелдан буён Samsung ўзининг сўнгги Galaxy S8 флагманидан 1 миллион донадан ошиқ сотишга муваффақ бўлган. Шу кунларда интернетда смартфоннинг баъзи бир фойдаланувчилари томонидан дисплейдаги носозлик, аниқроғи қизғиш тус даражасининг ҳаддан зиёд юқорилиги билан боғлиқ фикрлар оммалашмоқда. Қуйидаги экранлар ўртасидаги фарқни ва қизғиш рангни сезган бўлсангиз керак.
Бунга нисбатан Samsung зудлик билан баёнот эълон қилиб, харидорларини бу экран сифати билан боғлиқ муаммо эмаслигидан бохабар қилди. Маълум қилинишича, экрандаги қизил тусни қурилма созламаларида меъёрига келтириш мумкин. Маълум бўлишича, аксарият фойдаланувчилар бу муаммони созламалар орқали бартараф қилишган.
The Korea Herald нашрига кўра, Galaxy S8 фойдаланувчиларидан бири созламалар ёрдамида ҳам экрандаги ранг балансини тўғирлай олмаган ва экрандаги қизғиш ранг ўзгаришсиз қолган. Бунга нисбатан эса Samsung фойдаланувчига ўзига яқин хизмат кўрсатиш марказларидан бирига мурожаат қилишини маслаҳат берган.
Экспертларнинг фикрича, Samsung’нинг AMOLED матрицасида қизил-яшил ва кўк-яшил қуйи пикселларидан фойдаланилади. Иккала қуйи пикселда ҳам яшил туснинг мавжудлиги оқибатида юзага келадиган носозликни олдини олиш учун ҳам компания матрицанинг органик қаватида тўқ қизил рангли OLED панелидан фойдаланган. Дисплейдаги қизғиш тус меъёрининг бузилиши ҳам айнан ана шу тўқ қизил панел боис юзага келаётган бўлиши мумкин.
Samsung доим смартфон бозорида биринчи бўлиш мақсади билан ҳар бир гаджетида технологик янгилик қилишга интилади. Компания 2016 йилда тақдим этилган Galaxy Note 7 смартфонини кучлироқ аккумулятор билан таъминлашга ҳаракат қилгани боис, дунё миқёсида смартфоннинг оммавий ёниб кетиши кузатилган эди. Дастурчиларнинг фикрича, бу галги ранг билан боғлиқ муаммони Samsung операцион тизимдаги масъул дастурни янгилаш орқали ҳал қилиши мумкин бўлади.
