Хайр-эҳсонни онлайн амалга ошириш мумкин бўлди

Хайр-эҳсонни онлайн амалга ошириш мумкин бўлди


Ўзбекистон Республикаси Президентининг 2018 йил 16 апрелдаги «Диний-маърифий соҳа фаолиятини тубдан такомиллаштириш чора-тадбирлари тўғрисида»ги ПФ-5416-сон Фармонига мувофиқ, мамлакатимизда «Вақф» хайрия жамоат фонди ташкил этилган эди. Фонд олдига масжидлар ва диний таълим муассасаларининг биноларини қуриш, таъмирлаш, реконструкция қилиш, диний таълим муассасалари профессор-ўқитувчилари, тадқиқотчилари, мутахассислари ва ўқувчи-талабаларини моддий ва ижтимоий қўллаб-қувватлаш, аҳолининг ижтимоий ҳимояга муҳтож қатламлари, шу жумладан, имконияти чекланган шахсларни моддий ва маънавий қўллаб-қувватлаш каби бир қатор вазифалар қўйилган.

Ахборот технологиялари ва коммуникацияларини ривожлантириш вазирлиги ҳамда Дин ишлари бўйича қўмита, Ўзбекистон мусулмонлари идораси, Марказий банк, Ягона умумреспублика процессинг маркази Жамоат фонди фаолиятининг шаффофлигини таъминлаш бўйича зарур чораларни амалга оширди. Бу тўғрида Ахборот технологиялари ва коммуникацияларини ривожлантириш вазирлиги хабар бермоқда.

Хусусан, вазирлик «National Engineering Technologies» (MBank савдо белгиси) билан ҳамкорликда пул ўтказмаларини амалга ошириш, реал вақт режимида фондга келиб тушаётган маблағларни ҳамда харажатларни кузатиб бориш имконини берувчи биллинг тизимини ишлаб чиқди.

Бугунги кунда фойдаланувчилар мазкур биллинг тизимига «Click» (3 млн. нафар фойдаланувчига эга), «Payme» (тахминан 1 млн. нафар фойдаланувчига эга), «MBank» (тахминан 500 минг нафар фойдаланувчига эга) ҳамда «UPay» (тахминан 200 минг нафар фойдаланувчига эга) тўлов тизимлари орқали «Вақф», «Закот, фидя, фитр, ушр» ҳамда «Хайр-саховат» каби йўналишларда хайр-эҳсонларни амалга оширишлари мумкин.

Фондга пул ўтказмаларини нақд ёки пластик карта орқали амалга оширишга мўлжалланган Тошкент шаҳридаги 12 та масжидда биттадан, шунингдек Тошкент вилоятида жойлашган Зангиота зиёратгоҳи ҳудудида иккита инфокиосклар ўрнатилди. Бундай тўлов шакли ўзини оқлайдиган бўлса, Ўзбекистон бўйлаб «Вақф» фондига хайр-саховат тўловларини йўналтирувчи 4,5 мингта шундай тўлов аппаратларини ўрнатиш режалаштирилган.

Таъкидлаш жоизки, тўлов амалга оширилгач, фойдаланувчига транзакциянинг ID маълумотномаси тақдим қилинади. Фойдаланувчи www.vaqf.uz сайтига ушбу ID кодни киритиши ҳамда тўловнинг Фондга қабул қилинганига ишонч ҳосил қилиши мумкин.

«Вақф» фонди веб-сайти «UZINFOCOM» Ягона интегратори томонидан ишлаб чиқилган ҳамда www.vaqf.uz доменида синов тартибида фаолиятини олиб бормоқда. Сайт орқали Фонд фаолияти, амалга оширилган тадбирлар ҳамда хайр-саховат лойиҳалари хусусида маълумот олиш мумкин. Шу билан бирга, веб-сайтда алоҳида пул ўтказмалари бўйича ҳисобот жадвал шаклида ҳам тақдим қилинади.

Terabayt.uz сайтининг бепул эълонлар каналига қўшилинг.

Шуҳрат Сатторов

Журналист ва таржимон, 2012 йилдан ахборот технологиялари соҳасида фаолият юритиб келмоқда. Мобиль технологиялар, коммуникация, "электрон ҳукумат" тизими йўналишларида илмий изланиш олиб боради.