Xiaomi 12 Ultra юқори сифатли рендерларда намойиш этилди
Ўтган ҳафтада Digital Chat Station инсайдери қизил Leica логотипи туширилган Xiaomi 12 Ultra'нинг орқа панели тасвирланган суратни тақдим этган эди. Энди эса смартфоннинг умумий дизайнини кўрсатувчи янги суратлар эълон қилинди.
@OnLeaks ва Zoutonus инсайдерлари ҳамкорликда Xiaomi флагманини янги рендерларини тузиб чиқди. Суратлардан кўриниб турибдики, қурилма орқа панелида тўртта камера бўлади. Аввалги хабарларда смартфон Mi 11 Ultra каби учта камерага эга бўлиши айтилган эди. Катта эҳтимол билан янги моделга иккинчи телефото камера қўшилади.
Zoutonus берган маълумотларга кўра, смартфон 50МП асосий, 48МП ультракенг ва 48МП телефото камера билан жиҳозланади. Олд панелда эса юмалоқ тирқишли 20МП селфи камера бўлади.
Xiaomi 12 Ultra моделига икки томони қайрилган 6.6 дюймли AMOLED дисплейи ўрнатилиши айтилмоқда. Дисплей 1440 х 3200 резолюцияда бўлиб, у 120 гертс частот ва HDR10+ имкониятларини қўллаб-қувватлайди. Қурилма стерео динамик ва Snapdragon 8+ Gen1 чипи билан жиҳозланади.
Аввалроқ смартфон май ойида тақдим этилиши айтилган эди, бироқ тақдимот санаси бир неча ойга сурилгани хабар қилинди. Ҳозир ҳам қурилма қачон тақдим этилиши номаълумлигича қолмоқда.
