Xiaomi 12 Ultra'нинг аккумулятор сиғими ҳамда неча ваттда қувват олиши маълум бўлди
Mi 10 Ultra смартфони Xiaomi смартфонлари орасида биринчилардан бўлиб 120 ватт қувватлаш технологиясига эга бўлган эди. Аммо ўтган йилги Mi 11 Ultra'нинг қувватланиш имконияти 67 ваттга туширилди.
Digital Chat Station инсайдери янги Xiaomi 12 Ultra моделининг аккумулятори ҳамда зарядланиш хусусияти ҳақида маълумот берди. Унга кўра, янги моделга 120 ватт қувватлаш технологияси қайтарилади.
Шунингдек, 4,860 мАс сиғимли аккумуляторни 50 ваттда симсиз қувватлаш ҳам мумкин бўлади. Ultra моделнинг аккумулятор Pro моделникидан 260 мАс га кўпроқ бўлади.
Бошқа бир манбанинг берган маълумотларига кўра, Xiaomi 12 Ultra смартфонига 1440p+ резолюциядаги Samsung компаниясининг AMOLED дисплейи ўрнатилади.
Гарчи камераларнинг дизайни ўзгариб, уларни жиҳозлашда Leica билан ҳамкорлик қилинса-да, камераларнинг техник жиҳатлари аввалги Mi 11 қурилмасиники билан бир хил бўлади.
Қисқа қилиб айтганда, смартфон 50МП асосий камера, 48МП ультракенг камера ҳамда перископ линзали 48МП телефото камера билан жиҳозланади.
Ҳозирча қурилманинг қачон тақдим этилиши номаълум. Декабрь ойида тақдим этилган Xiaomi 12 ва 12 Pro моделлари ҳали глобал миқиёсда сотувга чиқмади.
ЎҚИНГ: Nubia Red Magic 7 смартфонининг тақдимот санаси маълум бўлди
