Xiaomi 13 кутилганидан эртароқ тақдим қилинади

Ўтган йилнинг декабр ойида Xiaomi ўзининг Xiaomi 12, Xiaomi 12 Pro ва Xiaomi 12Х флагман телефонларини тақдим қилган эди. Эндиликда компания ўзининг ўн учинчи авлод смартфонлари қатори устида ишламоқда ва у (ҳали тақдим қилинмаган) Snapdragon 8 Gen 2 чипсети билан чиқарилиши кутилмоқда. Сиздирилган янги маълумотларга кўра эса, бу йилги Xiaomi флагманлари кутилганидан олдинроқ тақдим қилиниши мумкин.

Хитойлик инсайдернинг хабар беришича, Xiaomi 13 смартфонлари Андроид 13 билан биргаликда синовдан ўтказилмоқда ва жараён ўтган йилгига қараганда бир ой олдинда бўлиб, бу Xiaomi 13 смартфонлари жорий йилнинг ноябр ойида чиқарилиши мумкинлигини кўрсатади. Янги авлод флагманлари Snapdragon 8 Gen 2 билан чиқарилар экан, Qualcomm ҳам ўзининг янги чипсетини ноябрда тақдим қилиши мумкин.

Маълум бўлишича, Xiaomi йил охирида ўтган йилгидек учта эмас, балки иккита флагманларни тақдим қилади. Булар эса Xiaomi 13 ва Xiaomi 13 Pro смартфонлари бўлиб, улар мос равишда "Nuva" ва "Fuxi" код номларини олишган, шу билан бирга, оддий вариант 2211133C, Pro вариант эса 2210132C модел рақамига бириктирилган.

Иккала модел ҳам экран юқори марказида тешикли селфи камера ва ингичка рамка билан қиррали OLED дисплейга эга бўлиши, шунингдек, икковида ҳам Leica томонидан ишлаб чиқилган учлик орқа камералар бўлиши кутилмоқда.

ЎҚИНГ: Xiaomi Black Shark 5 Pro'нинг техник жиҳатлари ва қадоқ таркиби билан танишамиз