Xiaomi 13 Lite қутидан очиб кўрсатилди!
Феврал ойининг охирида ўтказиладиган MWC 2023 тадбирида Xiaomi компанияси ўзининг янги авлод флагманлари, Xiaomi 13 ва Xiaomi 13 Pro смартфонларини тақдим қилишга тайёрланмоқда. Бироқ, сўнгги маълумотларга кўра, Xiaomi 13 серияси иккита эмас, балки учта моделни ўз ичига олади. Интернетда Xiaomi 13 Lite моделининг қутидан очиб кўрсатилган видеоси пайдо бўлди.
Бу биз биринчи марта Xiaomi 13 Lite ҳақида эшитишимиз эмас. Ушбу модел ҳақидаги маълумотлар ўтган йилдан бери миш-миш қилиб келинар эди. Ўшанда Xiaomi 13 Lite ҳеч қандай янгилик бўлмаслиги ёхуд у шунчаки Xiaomi Civi 2 смартфонининг қайта номланган варианти бўлиши айтилган эди ва бу хабарлар ўз тасдиғини топди.
Юқоридаги видеода энг биринчи смартфон дизайни билан танишишингиз мумкин. Қурилма олд экранининг ён томонлари эгилганлигини бир қарашда сезасиз. Ундан ҳам эътиборни тортадигани шуки, Xiaomi 13 Lite смартфони iPhone 14 Pro моделларида бўлгани каби "динамик орол" шаклидаги тирқишга эга ва у ерда иккилик селфи камералар иккилик LED чироқлари билан жойлашган.
Xiaomi Civi 2 ва Xiaomi 13 Lite бир-бирларидан дастурий таъминотда фарқ қилади. Lite модел Android 13 га асосланган MIUI 14 операцион тизимида ишлайди, Civi 2 эса Android 12 га асосланган MIUI 13 билан тақдим қилинган.
Видеода, шунингдек, Xiaomi 13 Lite ўралган қоғоз устида унинг техник хусусиятларини кўришингиз мумкин. Унга кўра, смартфон Snapdragon 7 Gen 1 чипсетида, 67 Вт "турбо" тезликда қувватланадиган батареяда ишлайди. Унинг AMOLED экрани 120 герц мослашувчан янгиланиш тезлигига эга ва у Dolby Vision, Dolby Atmos'ни қўллаб-қувватлайди. Учлик орқа камера тизимининг асосий сенсори 50МП.
Норасмий маълумотларга кўра эса, Xiaomi 13 Lite'нинг 6.55 дюймли FHD+ (1080 х 2400) резолюциясидаги дисплейининг остида бармоқ изини аниқлаш сканери жойлашган. У 8/12 ГБ оператив ва 128/256 ГБ доимий хотира билан 4500 мА/соат батарея билан ишлайди. Орқа томондаги қўшимча камераларининг бири 20 МП ултра-кенг, иккинчиси, 2 МП макро бўлади. Селфи камераларнинг иккови ҳам 32 МП эканлиги айтилмоқда. Алоқа ва уланишда борасида 5G, Wi-Fi 6 ва Bluetooth 5.2 қўллаб-қувватланади. Смартфонда 3.5 мм наушник уяси, ҳамда хотирани кенгайтириш учун microSD карта слоти ва FM радио мавжуд эмас. Смартфон 159.2×72.7×7.2 мм ўлчам ва 171.8 грамм қалинликда. Таҳминий нарх 256 ГБ хотира вариантли модел учун 549 евро (535 доллар) бўлиши мумкин.
Xiaomi 13 сериясининг глобал версияси 26 феврал куни тақдим қилиниши кутилмоқда.
ЎҚИНГ: Xiaomi 13 Pro глобал версияси қачон чиқарилиши маълум бўлди
