Xiaomi 13 Pro жонли суратларда тарқатиб юборилди
Ўтган йилгидан фарқли ўлароқ, Xiaomi компанияси ўзининг бу йилги флагман смартфонларини кутилганидан эртақроқ, ноябр ойида тақдим қилиши мумкин. Серияда икки модел: оддий ва ундан бироз каттароқ бўлган Pro модел бўлади. Интернетда ушбу Xiaomi 13 Pro моделининг ишлаб турган ҳолатдаги жонли суратлари тарқалди.
Хитойнинг Weibo ижтимоий тармоғига жойланган сурат бўлажак Xiaomi смартфонининг баъзи техник хусусиятларини ошкор қилади.
"Телефон ҳақида" саҳифаси кўрсатилган расмда смартфон (аввал миш-миш қилинганидек) "nuwa" код номига эга эканлиги кўриш мумкин.
12 + 3 (ГБ) сони қурилманинг оператив ва виртуал хотира ҳажмига тегишли бўлса, 3.0 гигагерцли олтили процессор ҳали тақдим қилинмаган Snapdragon 8 Gen 2 чипсети бўлиши мумкин. Қолаверса, смартфон Android 13'га асосланган MIUI 14 қобиғида ишлаши ҳам яққол кўриниб турибди.
Шунингдек, расмдан Xiaomi 13 Pro ҳам юмалоқ тешикли селфи камера ва ён томонлари бироз эгилган дизайнга эга эканлигини кўриш мумкин, худди Xiaomi 12 Pro каби.
Аввалги миш-мишларга ишонадиган бўлсак, Xiaomi 13 Pro модели 6.7 дюймли, 2К резолюция ва 120 герц янгиланиш тезлигига эга экран билан жиҳозланади.
