Xiaomi 13 Ultra экрани рекорд даражадаги ёрқинликка чиқа олади
Xiaomi компанияси ўзининг янги авлод Ultra флагманини глобал бозорга тақдим қилиш арафасида. Тақдимот санаси яқинлашгани сари Xiaomi 13 Ultra'нинг техник хусусиятлари ошкор бўлиб бормоқда.
Маълум бўлишича, Xiaomi 13 Ultra смартфони фавқулодда вазиятлар учун узоққа етадиган батарея режимига эга бўлади. Компания бу билан ўз флагманининг сўнгги 1% қуввати ҳам 60 минутгача етиши мумкинлигини таъкидламоқда. Қурилманинг янги ишлаб чиқарилган VC совутиш тизими эса иссиқликни аввалгисидан 300% яхшироқ тарқатади ва бу 4К форматида давомли 60 кадр/секунд видеолар олиш имконини беради.
Аввалги рендерлардан Xiaomi 13 Ultra орқа томони нано-чарм билан қопланганлигини кўрган эдик. Бу компаниянинг иккинчи авлод нано-чарм технологияси бўлиб, у ҳам кир ва ифлосланишларга қарши тура олади, тез сарғайиб кетмайди. Қолаверса, смартфон метал рамка билан ўралган ва у IP68 даражасида сув ва чангдан ҳимояланган.
Шунингдек, Xiaomi'нинг яна бир тизерларида 13 Ultra флагмани компания Huaxing билан ҳамкорликда ишлаб чиқарган C7 экрани билан жиҳозланишини маълум бўлди. У қувватни камроқ сарфлайди ва рекорд даражадаги 2600 нит максимал ёрқинликка чиқа олади. Айтиш керакки, бу ҳозирги исталган смартфонларнинг максимал ёрқинлигидан кўпроқдир: таққослаш учун Galaxy S23 Ultra экрани максимал 1750 нит, Oppo Find X6 Pro экрани эса 2500 нит ёрқинлик таклиф қилади.
Xiaomi 13 Ultra'ни энг аввало смартфон навбатдаги ўринда эса, эҳтимол, профессионал камера дейиш мумкин. Қурилма орқа томонидаги камера оролида тўртта камера сенсорлари жойлашган ва расмий маълумотларга кўра уларнинг асосийси 1 дюймли IМХ989 (50 MP) камера сенсори бўлса, қолган учтаси IМХ858 (50 MP) камера сенсорлари бўлади. Камералар атиги 0.8 секунд ичида суратга олиш қобилятига эга.
Xiaomi 13 Ultra расман 18 апрел куни тақдим қилиниши кутилмоқда.
