Xiaomi 13 Ultra – камерами ёки смартфон?
Глобал бозор учун бир йиллик танаффусдан сўнг, Xiaomi янги Ultra флагман билан қайтмоқда. Компания тез кунда ўзининг Xiaomi 13 Ultra смартфонини бутун дунёга намойиш қилмоқчи. Қурилма тақдимот санаси яқинлашар экан, кундан-кунга унинг янги тизер суратлари пайдо бўлмоқда.
Xiaomi ана шундай сизни қизиқтириб қўядиган тизер постерларнинг яна бирини улашилди. Унда сиз ҳақиқий камерани эслатиб юборадиган смартфонни кўришингиз мумкин.
Очиғини айтганда бу смартфонми ёки камера, буни бир қарашда айтиш қийин. Суратга олиш тугмаси билан қурилмадан чиқиб турган қалинлик профессионал камера аппаратини эслатиб юборади. Шунингдек, қурилмада смартфонлардагидек Қувват ва овозни бошқариш тугмалари ҳам яққол кўриниб турибди.
Юмалоқ камера оролида эса қандайдир ёзувлар бор ва агар суратни яқинлаштирадиган бўлсак, уларни ўқий оламиз. У ерда "67 mm Filter Adapter" ва "Ultra Photography Kits" ёзувларини кўришимиз мумкин ва булар бизга гап нима ҳақида кетаётганлигини очиқлаб беради – бу махсус фотографик аксессуарлар билан жиҳозланган Xiaomi 13 Ultra ёхуд смартфоннинг фотография учун мўлжалланган махсус версияси.
Таъкидлаш жоизки, ўтган йилги Xiaomi 12S Ultra'нинг ҳам Leica линзаларини улаш мумкин бўлган махсус Concept версияси намойиш қилинган эди, фақат у сотувга чиқарилмаган. Балки, Xiaomi бу йил ҳам ана шундай чекланган миқдордаги Xiaomi 13 Ultra вариантини тайёрлаётган бўлиши мумкин. Улашилган тизер постерда "ноёб Xiaomi 13 Ultra" "қайта кашф қилиш учун" (текинга) бериб юборилиши маълум қилинган.
Xiaomi 13 Ultra келаётган 18 апрел санасида тақдим қилиниши кутилмоқда.
