Xiaomi 13 "атмен": янги авлод Xiaomi флагман смартфони бошқача номланади

Xiaomi тез орада ўзининг янги авлод флагман смартфонларини тақдим қилади. Катта эҳтимол билан янги смартфонлар серияси "Xiaomi 13" деб номланиши кутилаётган эди, бироқ сўнгги миш-мишларга қараганда компания "13" рақамини ташлаб кетади ва тўғридан-тўғри 12 дан 14 га ўтади.

Хитойнинг Weibo ижтимоий тармоғида "Xiaomi 14" деб номланган Xiaomi смартфони қутисининг жонли сурати пайдо бўлди. Айтиш мумкинки, Xiaomi 14 қутиси устида қизил бренд белгиси ҳам бор ва бу Leica логотипи ҳисобланади. Шунингдек, Интернетда тарқатиб юборилган яна бир скриншот янги Xiaomi смартфони 14 рақами билан номланишини тасдиқлайди. Скришотдан кўриш мумкинки, 2211133C модел рақамли Xiaomi 14 смартфони Qualcomm яқинда тақдим қилган 3.2 гигагерцли Snapdragon 8 Gen 2 билан 12 ГБ оператив хотирада Android 13'га асосланган MIUI 14'да ишлайди.

Компания нима учун 13 рақамини ўтказиб юбораётгани ҳақида маълумотлар мавжуд эмас. Бироқ, интернет аҳолиси бунга 13 рақамининг "омадсиз" ёхуд "лаънатланган" деб ҳисобланиши сабаб бўлганига ишонишади. Шунингдек, 14 рақами смартфони номи унинг операцион тизими – MIUI 14'га мос бўлиши учун ҳам танланганлиги айтилмоқда. Айримлар эса (эҳтимол хазиломус тарзда, лекин ким билади дейсиз?) Xiaomi 14 смартфонлари бўлажак iPhone 14 смартфонлари билан тенгма-тенг рақобатчи бўлиши учун шундай номланганлигини таҳмин қилишмоқда.

ЎҚИНГ: Энг ингичка рамкали смартфон: Realme 10 Pro тақдим қилинди