Xiaomi Android Nougat'га янгиланадиган смартфонлари рўйхатини эълон қилди

Xiaomi компанияси айни пайтда Android Nougat'нинг ўзлаштирилган MIUI 9 операцион тизимини эълон қилишга тайёргарлик кўрмоқда. Янгиланган прошивка MIUI 8 билан солиштириб кўрганда, қатор афзалликларга эга. MIUI форумида эълон қилинганишича, компания шу кунларда операцион тизимнинг синов талқинини ишга тушириш арафасида.   

Шу билан бирга, Xiaomi компанияси ўзининг қайси смартфон моделлари Android Nougat операцион тизимида ишлашини ҳам эълон қилган. Унга кўра, бренднинг 14 та мобил алоқа воситаси илғор тизим бошқарувида ишлайди.

Улар қуйидагилар:

Xiaomi Mi5, Mi 5s, Mi 5s Plus, Mi4c, Mi4s, Mi Note, Mi Note 2, Mi MIX, Mi Max ҳамда Redmi Note 4X. Бу моделларнинг барчаси Android 7.1 Nougat тизимига янгиланади. Шунингдек, Xiaomi Mi6, Mi Max 2, Mi 5C ҳамда Redmi 4X эгалари ҳам тез кунларда Android 7.1 Nougat'ни янгилаб олишлари мумкин бўлади.  

Ҳозирча бир қатор оммабоп смартфон моделлари бу рўйхатга кирмаган. Мисол учун, Redmi Note 3 ёки Redmi Note 4. Буни қарангки, улардан олдин, яъни бундан 2.5 йил аввал тақдим қилинган Mi Note янги прошивкага эга бўлади. Лекин компания оммабоп смартфонлари учун ҳам яхши янгилик тайёрлаётгани аниқ.

Экспертларнинг фикрича, MIUI 9'га эга бўлган смартфонлар Android 7.0 Nougat'га хос илғор функцияларга эга бўлади. Жумладан, экранни бир вақтнинг ўзида бир неча қисмга бўлиб, бир нечта иловалардан фойдаланиш. Қолаверса, бу тизимда смартфон янада тезкор ишлаб, камроқ қувват сарф қилади. Яна бир муҳим инновация шуки, Android Nougat тизимида жорий қилинган "трафик тежаш" функцияси интернетдан самарали фойдаланиш имконини беради. Янги тизимда хавфсизлик масалаларига ҳам алоҳида эътибор қаратилган.

    ����