Xiaomi Beryllium – "қувватли" флагман смартфон

Сўнгги бир неча ойдирки, Хитойнинг тиниб-тинчимас Xiaomi корпорацияси ўзининг бир нечта янги смартфон моделларини тақдим қилди ва муваффақиятли сотмоқда. Улар орасида флагман, ўрта даражали ҳамда бошланғич имкониятли телефонлар бор. Хусусан, 8 ядроли, частота интервали 2,8 ГГц бўлган Qualcomm Snapdragon 845 процессорига эга Mi 8 ёки Mi MIX 2S флагманлари кўпчиликка манзур бўлди.

Шу йилнинг 9 июль куни XDA Developers форумида компаниянинг Xiaomi Beryllium номли янги, кучли флагмани ҳақида хабар тарқалди.

Яп-янги MIUI 10 мобил операцион тизими дастур яратувчилари "Xiaomi Beryllium" номли янги телефонга оид маълумотларга дуч келишган. Телефон дизайни тўлиқ ўлчамли, яъни 18:9 нисбатли экран билан диққатга сазовор. Унга ҳам 8 ядроли Snapdragon 845 чипсети ўрнатилади. Шу билан бирга, смартфондаги қўш сенсордан иборат бош камерада 2 карралик яқинлаштириш функцияси жорий қилинади.

Бўлажак флагманда яна бир қатор қизиқ жиҳатларнинг бўлиши ҳам маълум қилинган. Хусусан, телефонда NFC, Wi-Fi 802.11ac (2,4 ГГц + 5 ГГц) ҳамда Bluetooth 5.0 модуллари, шунингдек доимий хотирани 512 гигабайтгача катталаштириш имконини берадиган microSD бўлмачаси бўлади. Xiaomi Beryllium қадоқдаёқ Android 8.1 Oreo операцион тизимининг ўзлаштирилган MIUI 10 прошивкаси бошқарувида ишлайди. 

Смартфон бир неча ойлардан кўнг сотувга чиқарилади. Айрим экспертларга кўра, гаджет августдаёқ сотувга чиқади ва бозорда рақиб компанияларнинг кучли флагманларига қарши курашади. Унинг охир-оқибат "Mi 8S" ёки "Mi 8 Pro" деб ҳам номланиши тахмин қилинмоқда. Айтишларича, янги девайсдаги батарея сиғими 4000 мА соатдан ошади. Унинг Quick Charge 4.0+ технологияси асосида қувват олишини ҳисобга олсак, имкониятлар юқори.