Xiaomi дактилоскопли экранга эга Redmi Note 7 Pro’нинг ҳам намойиш кунини эълон қилди!
Тобора оммалашиб бораётган Xiaomi компанияси Redmi туркумидаги смартфонларини мустақил бренд сифатида ажратгач, унинг илк вакили билан ҳаммани ҳайратга солди. 48 мегапикселлик асосий датчикли бош камерага эга Redmi Note 7 ҳозиргача маҳаллий бозорда талаш бўлмоқда.
ЎҚИНГ: Xiaomi ҳам «ёнғоқчақар» Redmi Note 7’ни глобал версияда жаҳон бозорига чиқаряпти!
Ушбу бренднинг Ҳиндистон бўлинмаси ўзининг Twitter-саҳифасида реклама тизерини эълон қилди. Унда «7» рақами ва 28 февраль санаси акс эттирилган. Маълумки, компания айни шу куни Redmi Note 7 моделининг глобал версиясини Ҳиндистонда тақдим этади.
Реклама тасвирининг ўзида қурилманинг турли хусусиятларига ишоралар мавжуд: қўш модулли камера, 4000 мА/соатлик аккумулятор ва асосий оптик датчикнинг тасвир аниқлиги каби.
Агарда расмни каттайтириб разм солсак, бармоқ изи сканери экраннинг ўзига интеграция қилинганлигига ҳам шама қилинаётганига гувоҳ бўламиз («7» рақамининг юқори қисмида, қўшалоқ датчикдан ўнгроқда). Аммо қизиғи шундаки, Redmi Note 7 модели бундай технологияга эга эмас! Кузатувчилар шундан келиб чиқиб, Xiaomi мазкур санада «кичкина Кинг-Конг»нинг глобал версияси билан бирга, Redmi Note 7 Pro’ни ҳам расман тақдим этишини айтишмоқда.
Бунга яқин орада аниқлик киритилса керак, ҳозирча эса Xiaomi фанатлари барча эътиборларини бугунги тақдимотга қаратишган.
ЎҚИНГ: 205 долларлик Redmi Note 7 Pro февралдан сотувга чиқади!
