Xiaomi электромобилининг дизайни ошкор бўлди!

Xiaomi электромобилининг дизайни ошкор бўлди!

Ўзининг смартфонлари ва бошқа кўплаб электроникалари билан дунёга танилган Xiaomi компанияси электромобиллар бозори томон қадам ташлаётганлиги ҳеч кимга сир эмас. Бир неча йил аввал компаний ўз электромобилини ишлаб чиқариши ҳақида эълон қилган эди. Бугунга келиб, бўлажак машинанинг суратлари тарқалиб кетди.

Хитойнинг Weibo ижтимоий тармоғида МS11 ёхуд код номи Modena (ёки аксинча) бўлмиш Xiaomi электромобилининг ҳеч қандай камуфляжсиз суратлари пайдо бўлди. Эҳтимол, улар машинанинг маркетинг видеоси компютер экранида кўрсатилаётганида смартфон орқали суратга олинган. Гарчи тасвирлар унчалик сифатли бўлмаса ҳам биз Xiaomi электромобилининг умумий кўриниши ҳақида маълумот олишимиз мумкин.

Кўриб турганингиздек, МС11/Модена футуристик дизайнга эга. Xiaomi ўз машинаси дизайнини яратишда бошқа компаниялар машиларидан илҳомланганга ўхшайди: Интернет аҳолисининг сўзларига кўра, у олд томодан McLaren, орқа томондан эса Aston Martin машиналарини эслатиб юборади. Эҳтимол, агар бу Xiaomi электромобилини эканлигини билмаганингизда, бир қарашда уни Tesla ёки BYD'нинг янги машинаси деб ўйлардингиз ҳам.

Седан тана стилидаги 4 эшикли машинанинг олд пешонасидаги LiDAR сенсори мавжудлигини ҳисобга олсак, у автоном ҳайдаш қобилиятига эга бўлиши мумкин. Унинг томи эса тўлиқ ойна билан қопланган бўладиган кўринади. Машина ғилдирагида эса Ми логотипи кўзга ташланади. Афсуски, суратларда машинанинг фақат ташқи томонларини кўриш мумкин, электромобил ички суратлари мавжуд эмас.

Айтиш керакки, Xiaomi электромобилининг ишлаб чиқарилиши ўз якунига етмоқда. Яқинда компания ўзининг деярли тайёр бўлиб қолган машинасини Хитой кўчаларига "сайрга олиб" чиққан пайтида Интернетда унинг кўплаб "папараззи" суратлари пайдо бўлган эди, лекин машина камуфляж билан ўралган ҳолда бўлган.

Миш-мишларга кўра, MS11/Modena электромобили 260 кВт двигател билан икки батарея тўпламли конфигурацияга эга бўлади: оддий модел 400 волтли литюм темир фосфат батарея тўплами, юқори модел эса 800 волтли CATL Kirin батареясида ишлайди. Бундан ташқари, машинада Snapdragon 8295 - Qualcomm'нинг 5 нанометрли тўртинчи авлод автомобил чипи бўлади. Расмий маълумотларга кўра эса, Xiaomi ўзининг илк электромобилини 2024 йилдан оммавий ишлаб чиқаришни бошлайди.

Хитойда электромобиллар бозори шунчалик рақобатбардошки, ҳатто бу йўналишда глобал лидер деб ҳисобланадиган Tesla ҳам 24 фоизгача чегирмалар таклиф қилишига қарамай, маҳаллий электромобил ишлаб чиқарувчи брендлар билан рақобат қилишда катта қийинчиликларга дуч келмоқда.

ЎҚИНГ: OnePlus V Fold ва V Flip букламафонларини чиқаради