Xiaomi энди Apple ва Samsung’га зарба беряпти!
Apple ҳамда Samsung дунёдаги энг йирик смартфонсозлар эканидан хабаримиз бор – улар ҳар йили турли нарх тоифаларига мансуб 200 миллиондан ошиқ смартфонлар сотишади. Лекин бу икки гигант Хитой ва бошқа айрим Осиё мамлакатлари бозорида ўз улушларидан аста-секинлик билан ажралиб бормоқдалар. Бунинг сабаби – Хитой смартфонсозлари бўлиб, улар шу даражалардаги қурилмаларини анча арзон нархларда таклиф этишади.
Шунингдек, «хитойча Apple» дея таърифланувчи Xiaomi компанияси бу билан чекланиб қолмасдан, энди купертинолик гигантга «ўз уйида» ҳам ҳужум қилмоқда, деб ёзади AKKet нашри. Хитойлик смартфонсознинг бу юриши нафақат Apple, балки Samsung учун ҳам таҳдидлидир.
ЎҚИНГ: AliExpress: Xiaomi'нинг сиз эшитмаган 8 маҳсулоти
Хулласи калом, Xiaomi ижрочи директори Ван Сиань тасдиқлашича, компания АҚШнинг бирйўла иккита уяли алоқа оператори – AT&T ҳамда Verizon билан музокаралар олиб бормоқда. Мазкур келишувлар натижасида Xiaomi АҚШ ҳудудида ўзининг смартфонларини мазкур операторлар шартномаси билан ёки шартномасиз ҳам расман сотишни бошламоқчи.
Гарчи Apple Американинг, Samsung эса Жанубий Кореянинг компанияси бўлса-да, АҚШ мобил қурилмалар бозорида уларнинг улуши деярли бир хил. Бу бозорга 2018 йилда кириб боришни режалаштираётган Xiaomi смартфонлари сотила бошлагач, у ерда аҳвол тубдан ўзгариши аниқ. Ҳали ҳозирданоқ кўплаб америкаликлар Xiaomi смартфонларини бошқа мамлакатлардан буюртма қилиб олдиришмоқда. АҚШнинг ўзида расман сотила бошлагач, бу смартфонлар харидида анча маблағ тежаш имкони туғилади.
ЎҚИНГ: Xiaomi смартфонлари бунчалик оммабоплигининг 5 сабаби
Бошқача қилиб айтганда, АҚШлик фойдаланувчиларнинг кўпчилиги шуни англаб етишдики, Samsung ва Apple девайсларидаги каби функцияларга эга смартфонларни Xiaomi анча арзонга таклиф этиб келаётир. Хитойлик компания ижрочи директорининг сўзларига кўра, уларнинг маҳсулотлари АҚШ бозорида 2018 йилнинг ярмидаёқ расман савдога чиқарилади.
ЎҚИНГ: Xiaomi'нинг ўрта нархли, юртимизда сотилаётган смартфони кучли камерафонларни уялтирди
Шунингдек, АҚШнинг энг йирик уяли алоқа операторларининг салонлари орқали сотишдан ташқари, Xiaomi ўз смартфонларини сотиш учун бу мамлакатда ўзининг онлайн-дўконини ҳам ташкил этишни режалаштирган. Ундан кейин эса АҚШ ҳудудидаги энг йирик шаҳарларда савдо нуқталарини ҳам очиш кўзда тутилган. Бу эса потенциал харидорларнинг эътиборини янада кучлироқ жалб этиши турган гап. Натижада АҚШ смартфон бозорида ҳам Apple ва Samsung компанияларининг улушлари камайиб кетиши аниқ.
ЎҚИНГ: Ucell акция доирасида Xiaomi смартфонларига чегирмалар тақдим этмоқда
