Xiaomi Ғарбий Европа бозорини забт этмоқчи

Xiaomi Ғарбий Европа бозорини забт этмоқчи

Bloomberg нашри мухбирлари Xiaomi'нинг молия директори Чу Шоу Чжи билан суҳбатлашишга муваффақ бўлишди ва ундан компаниянинг келажакдаги режалари ҳақида билиб олдилар.

Директор сўзларига кўра, компания 5G'ни оммалаштириш йўлида кўп куч сарфлаб, Хитой бозорида муваффақият қозониш ниятида. Хусусан, 2020 йилда бешинчи авлод тармоқларида ишлайдиган 10 та смартфон чиқарилиши мўлжалланган.Аммо, Xiaomi учун биргина маҳаллий бозор ягона мақсад эмас. Компания Ғарбий Европа бозорини забт этмоқчи. Топ менежернинг сўзларига кўра, компания ушбу ҳудудда ҳам аллақачон сезиларли ютуқларга эришди ва барча смартфонсозлар орасида тўртинчи ўринни эгаллади. Энг катта ютуққа эришган Испания бозорида эса у ҳатто иккинчи ўринни эгаллади.

Компаниянинг бу ҳудуддаги муваффақияти фақат смартфонлар билан чекланиб қолгани йўқ. Ғарбий Европа фойдаланувчилари Xiaomi'нинг тақиладиган электрон маҳсулотларини тобора кўпроқ хоҳламоқда, бу борада эса компания Европа Иттифоқи бозорларида иккинчи ўринни эгаллаган.

Электр самокатларининг оммалашиши сабабли, компания Европа минтақасининг бир нечта мамлакатларида бозор улушининг 70 фоизини эгаллаган, аммо айнан қайси мамалакатлар эканлигини Чу Шоу Чжи ҳозирча сир тутишни лозим топди.

Шунигдек, Чу Шоу Чжи ўтган йил якунларига кўра, Xiaomi ўз маҳсулотларини сотишни 90 фоизга оширганини ва бозорларда энг тез ўсаётган тўртта бренд қаторига кирганини маълум қилди.

Xiaomi Лотин Америкаси, Африка, Жануби-Шарқий Осиё ва Ҳиндистонда ўз иштирокини кенгайтирмоқчи. Аммо, компания АҚШ бозорига киришни тезлаштиришни хоҳламайди. Xiaomi молия директори америкалик Mi мухлисларининг кутишига тўғри келиши мумкинлигини айтди. Афтидан, 2020 йилда АҚШ бозорига чиқиш Хитой компаниясининг режаларига киритилмаган.

ЎҚИНГ: Xiaomi бу смартфони нархини ярмидан ҳам пасайтирди! (+видео)