Xiaomi Huawei'га қарши уруш очди!
Xiaomi компанияси асосчиси ва раҳбари Лэй Цзюнь компаниянинг бу йилги асосий мақсадини маълум қилди — Хитой смартфон бозорида яққол пешқадамга айланиш.
Шу мақсад йўлида тобора танилиб бораётган бу бренд ички бозорни тўла ишғол қилиш чораларини ишлаб чиқмоқда. Бунинг учун кейинги 10 чорак давомида амалга ошириш белгиланган дастур тайёрланмоқда. Эслатиб ўтамиз, айни пайтда Хитойда Huawei компанияси смартфон етказиб бериш бўйича етакчилик қилиб келади.
«Биз Хитойни "ишғол қилсаккина", дунёни ҳам "эгаллаб олиш"га муваффақ бўламиз», — дейди жаноб Лэй Цзюнь катта ишонч билан. Бу сўзлар компания раҳбарининг ходимларига йўллаган мактубида келтирилган.
Компания етакчисининг маълум қилишича, Xiaomi 2017 йилда жуда юқори суръатда ўсишга эришган. Бунда бизнесни жаҳоннинг бошқа бозорларида ҳам кенгайтириш ҳисобига эришилган. Шу кунларда Xiaomi маҳсулотлари сайёрамизнинг 70 та давлатида сотилади.
Шу билан бирга, Лэй Цзюннинг фикрига кўра, компания маҳсулотларида сўнгги инновацияларни татбиқ қилаётгани ва сифатга қаратилган юқори эътибор бренднинг тезкор ривожланишида муҳим аҳамият касб этмоқда.
Xiaomi жаҳоннинг энг яхши смартфон ишлаб чиқарувчилари рейтингида "кучли бешлик"ка киради. Мазкур рўйхатдан жами 16 та смартфонсоз компания ўрин олган.
Технологиялар бозори экспертларининг сўзларига кўра, Xiaomi харидорлар диққатини ва садоқатини қисқа фурсат ичида забт этаётган компанияга ёрқин мисол экан. Гарчи, 2016 йил бу бренд учун оғир келган бўлса ҳам, смартфон савдоси 36% га тушиб кетган бўлса ҳам, бозордаги улуши бирданига 6% га пасайган бўлса ҳам, 2017 йилда Xiaomi оёққа туришга муваффақ бўлди.
Лэй Цзюнь бу синовли даврни енгиб ўтиш қийин кечгани ва қаттиқ меҳнат қилинганини яширмади. Компания раҳбарининг фикрича, бу "ўлим ёқасидан қайтиш"га тенг саъй-ҳаракат бўлган.
Рақиблари билан таққослаганда, бирорта компаниянинг смартфон савдосида бундай ўсиш суръати кузатилмаяпти. Қолаверса, 2017 йилнинг сўнгги чорагида компания Ҳиндистон смартфон бозорида пешқадамга айланди.
