Xiaomi илғор аудио-қулоқчинни тақдим қилди. Ярим баҳосида!
Анъанавий 3.5 мм.ли аудио-портидан маҳрум бўлган Xiaomi Mi 6 флагман смартфонининг тақдимоти чоғида хитойлик ишлаб чиқарувчи смартфондаги рақамли овоз узатиш технологиясини кўз-кўз қилган эди. Компания ўтаётган ҳафтада мазкур ва бошқа смартфонлар учун USB Type-C портига улашга мўлжалланган аудио-қулоқчинларни ҳам тақдим қилди.
Нимаси билан ўзига хос?
Шаклига кўра, наушниклар Xiaomi Mi Quantie «Hybrid Pro» гибрид қулоқчинларини эсга солади. Қулоқчиннинг частота диапазони 20-20000 Гц.ни ташкил қилади. Унинг муҳим ўзига хослиги — шовқинни камайтирувчи фаол (50-2000 Гц) функциядир.
Қора корпусли аудио-қулоқчин титан қотишмасидан тайёрланган, унинг сими ҳимоя қатлами билан ўралган. Бошқарув пултида шовқинни камайтиришни ишга туширувчи махсус тугма мавжуд. Наушниклар мусиқачи Лука Бинярди (Luca Bignardi) иштирокида ишлаб чиқарилгани маълум қилинган.
Нарх-навоси
USB Type-C портига уланувчи Xiaomi’нинг бу аудио-қулоқчинлари 299 юан, яъни $43 долларга баҳоланган. Унинг EarPods услубида ишланган модели эса $40 туради. Бу аудио-қулоқчинлар Xiaomi Mi 6, Mi 5s Plus, Mi 5s, Mi 5, Mi Note 2, Mi MIX смартфонларида тўлиқ ишлайди.
Шунингдек, Xiaomi Mi 4С ва Mi 4S смартфонида шовқинни камайтириш тугмаси ишламайди. Mi 5C ва Redmi Pro эса бу қулоқчинларни қўллаб-қувватламайди. USB Type-C портига эга бошқа бренд қурилмаларида ҳам унинг ишлашида носозлик келиб чиқиши мумкин.
