Xiaomi индингаёқ тақдим этадиган смартфонини «Келажакдан келган ҳадя» дея мақтамоқда (+видео)

Хитойлик корпорация кетма-кет турли моделларда смартфонлар тақдим этиб чарчамаяпти. Жумладан, унинг Mi Max 3 фаблети 3 июлда намойиш этилиши ҳақида ҳали бугун ёзгандик.

ЎҚИНГ: Mi Max 3 тақдимот санасини Xiaomi овозли ёрдамчиси «сотиб» қўйди!

Лекин Xiaomi боягина эълон қилган қисқа видеоролик юқоридаги маълумотни шубҳа остига қўймоқда. Бу лавҳада индинга – 28 июндаёқ тақдим этиладиган янги электрон қурилма реклама қилинган.

Мазкур видеороликда Xiaomi дўконларидан бири тасвирланган. Бирданига залда чироқ ўчиб қолади ва ёрқин мовий чақмоқ чақиб, намойиш стендида компания логотипи туширилган қадоқ пайдо бўлиб қолади. Бу худди «Терминатор» фильмининг бошидаги лавҳани эслатади.

Реклама ролигида хитойчада: «Бу – келажакдан ҳадя» деган овоз янграйди. Эсингизда бўлса, фильмда Терминатор ҳам келажакдан келиб қолган эди.

Мана, лавҳани бирга томоша қиламиз:

«Келажакдан келган ҳадя»нинг ўлчамлари оддий смартфондан каттароқ кўринади. Аммо Xiaomi икки кунгина аввал Mi Pad 4 моделини тақдим этганини инобатга олсак, бу янги қурилма планшет бўлмаслиги эҳтимоли юқори. Афтидан, бу Xiaomi Mi Max 3 фаблети бўлса керак.

Бу борадаги янгиликларни биз билан бирга кузатинг.

ЎҚИНГ: Атиги 170 долларлик, аммо металл корпус ва «ақлли» камерага эга Xiaomi Mi Pad 4 тақдим этилди