Xiaomi камера ва ички экранга эга келажак кўзойнакларини тақдим қилди
Xiaomi компанияси тўсатдан ўзининг янги ақлли кўзойноклари, Mijia Glasses Camera'ни тақдим қилди. Маълум бўлишича, Seiko компанияси ушбу қурилма устида 2 йил ишлаган ва у AR, тасвирга олиш учун мўлжалланган.
Mijia Glasses Camera'ни кўзойнак ва камеранинг бирлаштирилган варианти дейиш мумкин. Унинг оғирлиги 100 грамм бўлиб, унга Qualcomm'нинг 8 ядроли процессори ўрнатилган ва у 3 GB оператив ва 32 GB флеш хотирага эга.
Камераларга келадиган бўлсак, улар иккита: асосийси электрон тасвир стабилизациясига эга бўлган 50MP (ф/1.8) кенг-бурчакли линза, иккинчиси 5-15 карра оптик зум ва тасвир барқарорлиги технологияси билан 8MP (ф/3.4) перископ телефото линза билан таъминланган.
Улар орқали олинган тасвирлар ёхуд маълумотларни кўзойнакнинг 0.23 дюймли ва 328 дпи пиксел зичлигига эга Sony Micro OLED экранида кўриш мумкин. Қурилманинг 1020 mAh батареяси 10W тезликда магнитли уланиш орқали қувватланади. Қўшимчасига унда икки тармоқли Wi-Fi ва Bluetooth 5.0 мавжуд.
Кўзойнак камераси 100 дақиқагача тинимсиз видеога олишни қўллаб-қувватлайди. Шунингдек, қурилма AR технологияси билан интеграциялаштирилган ва у бир нечта тиллардан автоматик таржима қилиш хусусиятига ҳам эга.
Mijia Glasses Camera 3 августдан бошлаб Хитойда 400 доллар нархда сотувга чиқарилади.
