Xiaomi кўрсатмаган Redmi 6 Pro’нинг ёқиқ ҳолдаги суратлари кўп нарсани фош этди
Жорий йилнинг 12 июнида Xiaomi компанияси Пекин шаҳрида ўзининг ҳамёнбоп смартфонлар туркумидаги иккита моделини расман намойиш қилди. Булар – камерасига «сунъий онг» тизими жорий этилган Redmi 6 ҳамда компаниянинг энг арзон Redmi 6A телефонларидир.
ЎҚИНГ: "Ақлли камера"ли Redmi 6 тақдим қилинди
Аммо «хитойча Apple» бу тадбирда олтинчи авлод Redmi туркуми смартфонларининг барчасини намойиш қилмаган экан. Инсайдерлар мазкур туркумга мансуб, расман тақдим этилмаган Xiaomi Redmi 6 Pro моделининг ҳам турли жиҳатлари ҳақидаги маълумотларни ва унинг «жонли» суратларини тарқатишди. Келинг, бу борада Сяомишка нашри эълон қилган фактларга назар соламиз.
«Шунчаки яна битта Redmi» эмас!
Xiaomi Redmi 6 / 6A моделларидан фарқли ўлароқ, Redmi 6 Pro русумли қурилма тўлиқ экранли дизайнга эга. Корпусининг олд юзасини қоплаган 5,84 дюймлик экран трендга мос тарзда – томонлари ўзаро 18:9 нисбатли қилиб ишланган. Дисплейининг пикселлар зичлиги эса 2280х1080 га тенг бўлиб, бу Full HD+ формати ҳисобланади. Тақдим этилмаган ушбу смартфоннинг дизайнидаги ўзига хосликларидан яна бири – экраннинг тепасида Pixel 3 услубида ихчам «кемтик» мавжудлигидир.
Мана, Redmi 6 Pro смартфонининг илк «жонли» суратларини томоша қиламиз:
Айтиш керакки, олтинчи авлод Redmi смартфонлари орасида энг катта ўлчамлиси ҳам айни шу Redmi 6 Pro бўлади. Аммо унинг корпуси Redmi 5 Plus моделига нисбатан сал ихчамроқ – 149.3х71.6х8.7 миллиметрга тенг. Модел рақами M1805D1SE бўлган ушбу янги смартфон 178 грамм тош босади.
Техник хусусиятлари
Кўриб турганингиздек, Redmi 6 Pro’нинг қўшалоқ асосий камераси ҳам худди Xiaomi’нинг 2018 йилги кўплаб моделларидаги сингари – юқори чап бурчагида, тикка жойлашган. Орқа панелнинг ўртасидан эса, одатдагидек, бармоқ изи сенсори ўрин олган.
ЎҚИНГ: Redmi 6A: Xiaomi'нинг энг арзон янги смартфони
Навбатдаги суратда эса ишлаб турган ҳолатдаги Redmi 6 Pro экранини томоша қилишимиз мумкин. Жумладан, «Телефон ҳақидаги маълумотлар» бўлимидан олинган скриншот мазкур девайснинг номини ва айрим хусусиятларини тасдиқламоқда.
Гувоҳи бўлаётганингиздек, Xiaomi’нинг ушбу қурилмаси 4 гигабайтлик тезкор ва 64 гигабайтлик доимий хотирага эга экан. Redmi 6 Pro процессори эса 4 ядроли экани ва 2 ГГц такт частотасида ишлаши кўрсатилган. Афтидан, бу MediaTek Helio туркумига мансуб қандайдир янги чип бўлса керак. Смартфонга хитойча расмий MIUI 9.6 (V9.6.6.0.ODICNFD) прошивкаси ўрнатилган. Ушбу график қобиқ остида 2018 йилнинг 5 май санасидаги хавфсизлик патчига эга Android — 8.1.0 операцион тизим талқини ишламоқда.
Янада яхшиланган!
Инсайдерлар Redmi 6 Pro гаджетининг техник жиҳатларини ҳам маълум қилишган, аммо барча маълумотлар хитойчада. Лекин улардан смартфоннинг юқорида келтирилган ва бошқа айрим хусусиятларини англаб олиш унча мушкул эмас:
Гарчи Redmi 6 ҳамда 6A моделлари билан солиштириб кўрсатилган ушбу маълумотлар расмий бўлмаса-да, ҳақиқатга анча яқин. Унга қараганда, Redmi 6 Pro камераси янада такомиллаштирилган «сунъий идрок» алгоритмларига эга. Шунингдек, унга биометрика орқали смартфонни қулфдан чиқарувчи «Юзни таниш» (Face unlock) функцияси ҳам жорий этилмоқда. Шунингдек, Redmi 6 Pro моделининг ўз «ука»ларидан яна битта асосий фарқи – янада сиғимдорроқ, яъни 3900 мА/соатлик аккумуляторидир.
Ҳали расман тақдим этилмаган бу смартфон ҳақида айни дамгача фақат шулар маълум. Булардан ташқари, Redmi 6 Pro ҳам жорий ойнинг ўзидаёқ намойиш этилиши борасида тахминлар мавжуд. Бу борадаги янгиликлардан биринчилар қаторида бохабар бўлиш учун бизни кузатишда давом этинг.
Xiaomi’нинг аллақачон бозорга чиқарилган аксарият смартфонлари эса Ўзбекистонда ҳам расман сотилмоқда. Жумладан, ўзимизнинг «Terashop.uz» онлайн дўконимиздан уларни нақд пулсиз тўлов усуллари орқали ҳам олишингиз мумкин.