Xiaomi кучлиларни йиғишда давом этмоқда
Жаноб Чанг Ченгни танисангиз керак. У авваллари Lenovo'нинг мобил бўлими Вице-президенти бўлиб ишлар эди.
Жаноб Ченг яқинда компаниядан истеъфо берди ва қизиғи, энди Xiaomi'га қўшилди. Бу ҳақида South China Morning Post сайти хабар бермоқда.
Xiaomi'нинг ҳамасосчиси Лин Бин компаниянинг бошқа асосчилари ҳамда жамоага янги қўшилган Ченг билан тушган расмини Weibo ижтимоий тармоғига жойлади. Орадан кўп вақт ўтмай Ченг буни репост қилиб, фото остига «Орзуларинг учун қаттиқ ишла», деб ёзиб қўйди.
Чанг Ченг Lenovo'нинг ZUK смартфон бўлимидаги фаолияти билан айниқса машҳурдир. Ушбу суб-бренднинг смартфонлари ўзининг ҳамёнбоп нархи ва ўта нафис фойдаланувчи интерфейси билан ҳаммани лол қолдирган эди. Суб-бренд кейинчалик ёпилиб кетди, бироқ у яратган интерфейс Lenovo смартфонларига — жумладан, глобал бозорга чиққан Lenovo Z6 флагманига — ўрнатилишда давом этди.
Ченг, шунингдек, илк Yoga лептопи, Lenovo K900 смартфони ва Lenovo Z5 ва Lenovo Z6 қурилмалари яратилганда Lenovo'да ишлар эди.
Собиқ диркетор янги жамоасидаги лавозимини ҳозирча очиқлаганича йўқ. У Redmi, Black Shark ёки MIUI каби суб-брендлар/бўлимларда ишлайдими ёки компаниянинг эҳтимолий янги бўлимида ишлайдими-йўқми, буниси маълум бўлишини кутишимизга тўғри келади.
Компания ҳисоботида эса Леи Жун жаноб Ченгни таърифлар экан унинг «соҳани чуқур билиши ҳамда истеъмол электроникаси соҳасида катта бошқарувчилик тажрибаси»га эгалигини таъкидлади. Яна айтилишича, у «компанияни мобил телефонлар бизнеси борасида кучли қўллаб-қувватлайди».
ЎҚИНГ: Xiaomi’нинг янги хити сотувга чиқиб, унинг иккита рақиби арзонлашди
