Xiaomi Mi 10 Lite – квадрокамерали ҳамёнбоп 5G-флагман намойиш этилди!

  •   DiMaX
  •  4574
  •  28.03.2020 16:21

Xiaomi Mi 10 Lite – квадрокамерали ҳамёнбоп 5G-флагман намойиш этилди!

«Хитойча Apple» кеча – 27 март куни навбатдаги онлайн тақдимот тадбирини ўтказди. Унда маҳаллий бозорда аллақачон сотилаётган Mi 10 ҳамда Mi 10 Pro флагманларининг глобал анонсидан ташқари, Xiaomi Mi 10 Lite русумли янги смартфонини ҳам кўрсатди.

ЎҚИНГ: Xiaomi яна бир шаффоф флагманини намойиш этди! («жонли» расмлар)

Аввало таъкидлаш керакки, Xiaomi Mi 10 Lite – аввал маҳаллий бозор учун чиқарилган бирорта смартфоннинг ренейминг қилинган варианти эмас, балки буткул оригинал моделдир. Эсингизда бўлса, ҳали тақдим этилмаган Xiaomi Mi 10 SE моделининг «жонли» сурати ва техник хусусиятларини ҳам эълон қилган эдик, лекин униси ҳақида ҳозирча умуман бошқа маълумот йўқ, кеча намойиш қилингани эса бошқа қурилма.

Иккита «оға»си каби, Xiaomi Mi 10 Lite ҳам бешинчи авлод уяли алоқа тармоғини қўллаб-қувватлайди. Фақат у энг илғор – Snapdragon 865 чипсети эмас, балки Qualcomm’нинг нисбатан камтарроқ Snapdragon 765G процессори базасида ишлайди.

Унга 6 ёки 8 гигабайтлик тезкор хотира елкадошлик қилади, смартфон доимий хотираси 64 ва 128 гигабайтлик вариантларда тақдим этилган.

ЎҚИНГ: Xiaomi Mi 10 DxOMark рейтингида биринчи

Xiaomi Mi 10 Lite корпуси 8 миллиметрлик қалинликка, ва 192 грамм вазнга эга бўлиб, металл ромли, орқа панели эса шишадан ишланган. Диагоналига 6,57 дюймлик AMOLED TrueColor дисплейнинг тасвир аниқлиги FullHD+ форматида, экраннинг ўзига бармоқ изи сканери ҳам интеграция қилинган.

Смартфоннинг аккумулятори 4160 мА/соатлик, у 20 ваттлик технология бўйича тезкор қувват олади. Xiaomi унга контактсиз тўловлар учун NFC модулини ҳам ўрнатган.

ЎҚИНГ: Xiaomi асосий даромадни қаердан оляпти?

Mi 10 Lite олд камераси дисплейнинг томчисимон кемтигига жойланган ва 16 мегапикселлик якка датчикка эга. Бош камера бўлса тўртбурчак блокка бирлашган тўртта модулни ўз ичига олади. Ундаги асосий сенсор 48 мегапикселлик, қолганлари эса 8 + 2 + 2 мегапикселлик аниқликда.

Xiaomi Mi 10 Lite оқ, яшил ва кул ранг тусли корпусларда, май ойи бошидан Европа бозорига чиқади. Унинг бошланғич – 6/128 гигабайтлик тезкор/ички хотирали варианти компания флагманларининг ярим нархида – 349 евродан бошлаб сотилади. Қолган версияларининг нархи ҳозирча номаълум.

ЎҚИНГ: Xiaomi уч йил аввалги флагманини замонавий қилиб қайта чиқаряпти!

Terabayt.uz сайтининг видеолари: Youtube'даги каналимизда!