Xiaomi Mi 7’нинг янги сурати тарқалди – у «тўнкарилган» Mi Mix’га ўхшайди
Жорий йилда Барселонада бўлиб ўтадиган MWC 2018 кўргазмасига Xiaomi компанияси ўзининг флагмани – Mi 7 смартфонини олиб келиши кутилаётир. Гарчи ишлаб чиқарувчи сир тутаётган бўлса-да, унинг ташқи кўриниши ва ички – техник ва дастурий таъминоти билан боғлиқ анча-мунча маълумотлар тарқалган.
ЎҚИНГ: Xiaomi Mi 7’нинг илк ҳақиқий сурати чиқди
GizChina нашрининг хабар беришича, ўзининг ишлаб чиқариш жараёнига алоқадорлигини даъво қилувчи битта манба Weibo тармоғида ушбу флагманнинг суратини эълон қилган.
Қуйидаги расмда кўриб турганингиздек, смартфоннинг олд панелини дисплей деярли бутунлай эгаллаб олган. Унинг тепасидаги ромда олд камера, ёруғликни ва яқинлашувни аниқловчи датчиклар мавжуд. Шунингдек, шу жойда қиёфани аниқлаш функциясига эга сканер ҳам жойлашиши мумкин. Дактилоскопик сенсор эса корпуснинг орқа соҳасига ўрнатилган.
Суратда логотипнинг порлаб турганига қараганда, Mi 7 корпуси чиндан ҳам шишадан ишланмоқда. Бу шундан далолат берадики, мазкур модел Xiaomi’нинг симсиз қувватлаш технологиясига эга илк смартфони бўлади.
ЎҚИНГ: Xiaomi фанатлари 5 йил кутган хусусият Mi 7’да жорий этилади
Булардан ташқари, тасдиқланган маълумотларга кўра, Xiaomi Mi 7 флагмани энг янги Snapdragon 845 процессорига ва, эҳтимол, «сунъий идрок» технологиясини қўллаб-қувватловчи қўшимча чипсетга ҳам эга бўлади. Шулар эвазига ушбу смартфон янада сифатли суратлар ола билиши ва аккумулятор қувватини оптималлаштирган ҳолда сарфлаши айтилаётир.
Дарвоқе, бўлажак флагман ташқи қиёфаси Mi Mix’ни «ағдариб» қўйгандек кўринишини пайқагандирсиз?
ЎҚИНГ: Xiaomi’нинг янги смартфонлари сунъий идрокка ва фантастик имкониятларга эга бўлади
