Xiaomi Mi 8 "фантастик натижа" кўрсатди
Шубҳа йўқки, 2018 йилнинг ўрталарига келиб тақдим қилинган Xiaomi Mi 8 ҳозирча кўпчиликнинг қизиқишини уйғотган флагманлардан бири бўлиб турибди. Қиёфани уч ўлчамли биометрик ўлчамда текшириб, тўлақонли фаолият кўрсатадиган қиёфа сканерига эга бўлган ҳамда телефондаги маълумотлар хавфсизлигини 99,97% таъминлайдиган мазкур аппарат ҳозирча сотувга чиқарилгани йўқ. Кеча Xiaomi компанияси асосчиси Лэй Цзюнь "ақлли телефон"нинг навбатдаги ўзига хосликлари билан бўлишди.
Xiaomi компания бош директори Weibo ижтимоий тармоғидаги ўзининг саҳифасида ўзи икки ҳафтадан бери фойдаланаётган Mi 8 смартфонининг фаолияти билан боғлиқ скриншотни эълон қилди. Унда смартфоннинг қувват таъминоти билан боғлиқ жиҳатлар акс этган. Айни пайтда кўпчиликни худди шу савол қизиқтираётган эди.
Ўқинг: Mi 8 iPhone X ва Galaxy S9'ни "ер тишлатди"!
Бош директор қайд этган натижалар кўпчиликни ҳайратга солди. Унга кўра, бош директорнинг Xiaomi Mi 8 телефони тўлиқ қувват билан 1 кун, 10 соат, 44 минут ҳамда 57 секунд ишлаганида унда ҳали сарф қилинмаган 18% қувват бўлган. Шубҳасизки, бу жуда яхши натижа.
Хитойнинг муваффақиятли бизнесменларидан бўлган Лэй Цзюннинг қайд этишича, Xiaomi Mi 8 бу вақт оралиғида кўп қувват талаб қиладиган Wi-Fi ҳамда 4G тармоқларида фаол фойдаланилган, шу билан бирга огоҳлантиришларни кўриш учун экран бир неча маротаба текширилган, электрон хатларга жавоб берилган ҳамда мессенжерларда суҳбат қурилган. Шу тахлит, телефон ўртача даражада фойдаланганда тўлиқ қувват билан деярли 2 сутка ишлаб бера олади. Тан олиш керак, бу юқори даражадаги флагманларга хос "фантастик" натижа!
Эслатиб ўтамиз, Xiaomi Mi 8 модели 8 ядроли Qualcomm Snapdragon 845 процессори ҳамда ток сиғими 3400 мА соат бўлган батарея билан таъминланган. Таъкидлаш жоизки, смартфон 0 дан 100% гача қувват олиши учун бир соатдан камроқ вақт керак бўлади. Сабаби гаджетда Quick Charge 4.0+ қувватлаш технологияси татбиқ қилинган.
