Xiaomi Mi Mix 2S’нинг расмий суратлари у ҳақдаги ёлғонларни фош этди
Xiaomi компанияси расмий тақдимот маросимига бир ҳафтача вақт қолганида Mi Mix 2S смартфонининг суратларини ошкор этди. Хитойнинг Weibo ижтимоий тармоғида бу қурилманинг реклама учун тайёрланган расмлари тарқалиб кетди.
ЎҚИНГ: Ниҳоят, Xiaomi илк бор Mi MIX 2S’ни расман кўрсатди!
Афсуски, узоқ кутилган бу смартфон «хитойча Apple» мухлисларининг ҳафсаласини пир қилди. Зеро, шу пайтгача Mi Mix 2S моделига нисбат бериб келинаётган кўплаб хусусиятлар унда йўқ эканлиги маълум бўлди-қолди.
Келинг, шу пайтгача Mi Mix 2S ҳақида тарқалган маълумотларнинг қайсилари ёлғон бўлиб чиққанига бирма-бир назар соламиз.
- Янги девайс эски дизайнда экан – унинг ташқи қиёфаси ўтган йили тақдим этилган Xiaomi Mi Mix 2 моделидан умуман фарқ қилмайди. Эсингизда бўлса, унинг экрани iPhone X каби «ўйиқ»ли бўлишини айтишган, кейинчалик бу хабарнинг фейк экани аниқланган эди.
ЎҚИНГ: Бизни алдашибди: iPhone X услубидаги Xiaomi Mi Mix 2s суратлари фейк бўлиб чиқди!
- Ушбу девайснинг олд панели фақатгина экрандан иборат бўлиши, дисплей роми умуман бўлмаслиги айтилган эди. Лекин расмий суратларида смартфон экранининг пастида каттагина ром кўриниб турибди.
ЎҚИНГ: Ниҳоят, Xiaomi Mi MIX 2S илк «жонли» суратда: мутлақо ромсиз дисплейда бармоқ изи сканери!
- Mi Mix 2S экранининг юқори бурчагида «кемтик» бўлиши ва у ерга олд камера жойлаштирилиши хабар қилинган эди. Аммо расмий суратида экран бутун экани аён бўлган.
ЎҚИНГ: ЭКСКЛЮЗИВ ВИДЕО: Xiaomi Mi Mix 2S олд камераси экран бурчагидаги «кемтик»да экан!
Xiaomi ўзи кўрсатган расмга кўра, янги флагманининг селфи-камераси экран остидаги катта ромнинг бурчагида бўлади.
- Янги технологиялардан бири – экраннинг ўзига бармоқ изи сканери жорий этилишини Xiaomi Mi Mix 2S моделида кўпчилик кутган эди. Бироқ бу борадаги хабарлар ҳам ёлғон бўлиб чиқди – смартфоннинг орқа панелида бармоқ изи сканери мавжуд.
ЎҚИНГ: Xiaomi тайёрлаётган – сканерли дисплейга эга, 256 ГБ хотирали смартфонни томоша қиламиз!
- Xiaomi ниҳоят Mi Mix 2S флагманига иккита модулли асосий камера ўрнатиши ҳақида маълумотлар тарқалганди. Ҳатто ушбу камера «сунъий онг» тизимига эга бўлиб, модуллари бир-биридан алоҳида ҳам ишлай олишини айтишганди. Бу ҳам саробга айланди – юқоридаги суратда унинг орқа панелида биттагина объективли камера кўриниб турибди.
ЎҚИНГ: Xiaomi: «сунъий онг»ли Mi MIX 2S камерасининг модуллари бир-биридан мустақил ишлайди!
Юқоридагилардан келиб чиқадиган бўлсак, Xiaomi Mi Mix 2S смартфонида татбиқ этилган асосий янгиликлар – илғор Snapdragon 845 процессори ҳамда камерасидаги янгича датчиги бўляпти, холос.
Ҳаттоки мана бу лавҳада кўрсатилган қурилма ҳам Mi Mix 2S эмас, бошқа смартфон бўлиб чиқяпти:
ЎҚИНГ: Xiaomi Mi Mix 2S’нинг илк «жонли» видеосини кўрамиз!
Хулласи калом, ҳозиргача Xiaomi Mi Mix 2S смартфонига нисбат бериб келинган ва энди ёлғонлиги фош бўлган жиҳатлар шулардан иборат. Бу модель ҳақида яна бошқа тафсилотлар маълум бўлиб қолса, хабар берамиз – биздан узоқлашманг.
Шунингдек, Xiaomi’нинг савдога чиқарилган кўплаб смартфонлари ва бошқа маҳсулотлари Ўзбекистонда ҳам сотилаётганини эслатиб ўтамиз.
ЎҚИНГ: Xiaomi смартфонлари ва бошқа девайсларининг нархлари (2018 йил 19 март)
