Xiaomi Mi6’га аввалдан буюртма берганлар 2 миллиондан ошди
Пекинда 19 апрел куни тақдим қилинган Xiaomi Mi6 флагмани 28 апрелдан смартфон бозорига сотувга чиқарилади. Катта шов-шувларга сабаб бўлган смартфоннинг талаш бўлиб сотилишига шубҳа қолмади. Айниқса, йирик етказиб берувчилар смартфоннинг расмий нархи устига $30 ва $44 долларгача нархни қўшиб, олдиндан буюртма олишни бошлашган. Шундай бўлса ҳам, смартфонни биринчилардан бўлиб қўлга олиш истагида бўлганлар сони камайгани йўқ.
22 апрел ҳолатида Хитойнинг JD.com — Интернет-савдо ва электрон тижорат билан шуғулланувчи савдо майдончасидан, шунингдек мамлакат бўйлаб бошқа етказиб берувчиларнинг сайтларидан жами 2 миллиондан зиёд киши Xiaomi Mi6’га аввалдан буюртма берган. Экспертларнинг таҳлилларига кўра, Xiaomi компанияси аввалига харидорларнинг Mi6’га бўлган талаб ва эҳтиёжларини қондира олмайди.
Эслатиб ўтамиз, смартфоннинг 6 ГБ тезкор ҳамда 64 ГБ доимий хотира талқини $363 (2499 Yuan), 6 ГБ тезкор ва 128 ГБдоимий талқини — $421 (2899 Yuan), ҳамда 6 ГБ / 128 ГБ хотирали махсус «керамика» талқини $435 (2999 Yuan) АҚШ долларидан сотувга чиқарилади.
Смартфонга бўлган катта қизиқишнинг сабаби аниқ — унда ҳозирча ноёб бўлган, Samsung Galaxy S8/S8 Plus’да ўрнатилган жаҳоннинг энг кучли, 2,45 ГГц частота тезлигида ишлайдиган 8 ядроли Snapdragon 835 процессоридир.
Xiaomi Mi 6 муваффақиятнинг 3 омили: 1. Apple ва Samsung’га хос мобил трендларнинг жорий қилингани; 2. Компаниянинг смартфон яратиш ёндашувидаги шахсий “имзо”си; 3. Ҳамёнбоплиги.
Xiaomi Mi6’га 5,15 дюймли FullHD дисплей, Adreno 540 видеокартаси, 6 Гб оператив ҳамда 64/128 Гб доимий хотира ўрнатилган. Смартфоннинг қўш модулли 12 МП сиғимли бош камераси сифатли сурат олишда жаҳоннинг энг зўр камерафонларидан бири бўлган iPhone 7 Plus флагманининг камераси билан бемалол беллаша олади. Шунингдек, Xiaomi Mi6’нинг 8 МП олд камера, биометрик сканер, электр токи сиғими 3350 мА соат бўлган аккумулятор билан смартфон бозорининг пешқадам гаджетларидан бири бўлиши кутилмоқда.
