Xiaomi Mi7'даги бир жиҳат унинг савдосига салбий таъсир қилади
2017 йилда Apple компанияси жамоатчилик эътиборига iPhone X флагманини тақдим қилганида, кўпчилик экспертлар ва мухлислар бу моделнинг устидан кулиб, норозилик билан қарши олган эдилар. Бунинг сабаби -- янги айфоннинг экрани устидаги ўйиқ бўлган.
Шу йилнинг февралида эса кўплаб Android-смартфон ишлаб чиқарувчилари айнан айфонники каби "қош-кўзли" смартфон ишлаб чиқаришга киришиб кетганлари маълум бўлди. Худди шу жиҳат Xiaomi Mi 7 моделида ҳам бўлиши кўпчиликнинг диққатини оширмоқда.
Аксарият фойдаланувчиларнинг фикрича, олд панел юқорисида ўйиғи бор смартфонларни харид қилмаслик керак. Боиси, бундай ўйиқлар смартфонда бирор контентни кўриш ёки ўқишга халақит қилади. Бироқ, ишлаб чиқарувчилар бу норозиликка эътибор қаратишмаяпти.
Бугун Weibo тармоғида IT-корпорациялар орасида шуҳрат қозонаётган Xiaomi компаниясининг яги флагмани бўлмиш Xiaomi Mi 7 смартфонининг олд панели акс этган сурат тарқалди. Унга кўра бу модел ҳам "айфономания"га йўлиққан ва экран устида машҳур ўйиқ қолдирилган.
Шу билан бирга, Xiaomi Mi 7 девайсининг экрани остида сезиларли ҳажмдаги бўшлиқ ҳам мавжуд. Бу эса олд панел дизайнини бузиб турибди. Янги смартфонининг экран устида ўйиқ ишлаган компания ўз мухлисларини икки гуруҳга бўлиб қўйди: биринчи гуруҳ янги смартфон харид қилиш истагида бўлса, иккинчи гуруҳ бундай ўйиқ эвазига Mi 7 девайсини харид қилмаслиги мумкин.
Қолаверса, Xiaomi Mi 7 экрани устидаги ўйиқ ҳажми ҳам сезиларли даражада катта. Боиси, бу ерда юзни уч ўлчамда текширувдан ўтказадиган сканер эгаллаган. Маълумотларга кўра, бу сканер ҳар қандай шароитда ишлайди ва маълумотлар хавфсизлигини 100% таъминлай олади, худди iPhone X каби.
Ҳозирча эълон қилинган хабарларга кўра, Xiaomi Mi 7 апрел-май ойлари оралиғида тақдим қилинади. Унинг кучли жиҳати сифатида Qualcomm Snapdragon 845 процессори ҳамда 8 гигабайтли оператив хотирасини айтиш мумкин.
Дарвоқе, эртага -- 27 март куни компаниянинг Xiaomi Mi MIX 2S смартфони тақдим қилинади. Бу тўғридаги илк ишончли хабарларни бизда кузатиб боринг.
