Xiaomi'нинг арзон, бироқ қимматидан яхшироқ 4 та смартфони

Xiaomi'нинг арзон, бироқ қимматидан яхшироқ 4 та смартфони

«Қанча қиммат бўлса — шунча яхши» қоидасини Xiaomi смартфонларига нисатан ишлатиб бўлмайди. Xiaomi компанияси ишлаб чиқарган арзон моделлар ҳам аксарият ҳолларда муносиб смартфонлар бўлиб чиқади. Қуйида бу фикрни исботлаб бермоқчимиз.

Xiaomi Redmi 5 Plus — арзон ва муносиб, Redmi Note 5A Prime моделидан кўра яхши гаджет.

Ҳашамдор металл корпусли Redmi 5 учун танланган сифатли экран ҳам 18:9 ўлчамли, камераси эса сифатли ҳамда қувват олиши тезкор (ҳамёнбоплар билан таққослаганда, албатта — 5В 2A), процессори ҳам самарадор ҳамда аккумулятор қуввати ҳам қувонарли. Юртимиздаги баҳоси 1 104 000 сўмдан бошланувчи смартфон фойдаланувчининг талабларига мос келади. Xiaomi Redmi 5 Plus моделини эса 1 370 000 сўмдан бошлаб харид қилиш мумкин.

Redmi Note 5A Prime модели фаблет ҳисоблангани учун айрим жойларда Xiaomi Redmi 5 Plus моделидан қимматга баҳоланган. Аслида эса бу моделнинг имкониятлари юқоридаги рақиблариникидан пастроқ.

Xiaomi Redmi Note 4 — ҳамёнбоп ва Mi A1 моделига қараганда яхшироқ модел.

Xiaomi одатда Redmi туркумида ҳамёнга муносиб смартфонларни ишлаб чиқаради. Mi туркуми эса қимматбаҳо флагманлар учун танланган.

Redmi Note 4 бугун юртимизда 1,1 миллион сўмдан сотилаётган бўлса, худди шу процессорга эга «ҳашамдор» Mi A1 модели 1 536 000 сўмдан бошлаб сотилмоқда. Ваҳоланки, Mi A1 аккумулятор сиғими камроқ. Дизайни бир қарашда  iPhone 7 моделини эслатгани учун унга кўпроқ пул сарфлаш бир оз ноўрин.

Mi A1 моделининг тезкор хотира сиғими 1 гигабайтга катта бўлгани ёки бош камера сенсори қўш объективли экани билан унинг имкониятлари Redmi Note 4 моделидан юқори эмас.

Аслида Mi A1 ва Redmi Note 4 камералари кундузи яхши сурат олса, кечки пайтда камера ўзини тамоман йўқотиб қўяди. Биргина устунлик бор Mi A1 модели "4K" сиғимли видео тасвирга оади. Бироқ бундай видео ҳамма учун ҳам зарур эмас. Шунингдек, унга рамзий маънода 2 карралик яқинлаштириш функцияси ҳам ўрнатилган. Бу функция аслида умуман керак эмас.

Mi A1 модели кўринишидан диққат-эътиборни хоҳлаганлар учун бўлса, Redmi Note 4 — "асл айнимас" нақлига амал қилувчилар учун айни муддао. Ҳатто Redmi 5 Plus (яъни Redmi Note 5) савдога чиққанидан сўнг ҳам Redmi Note 4 савдоси пасайгани йўқ.

Xiaomi Mi6 — Mi Mix 2'дан арзон ва яхши

Қимматбаҳо Mi смартфонларининг энг қиммати ҳам пулига муносиб эмас. Mi Mix 2 бугунги кунда юртимизда 3.5 миллион сўмдан қимматга баҳоланган. Бу нархни унинг дизайни учун тўлайсиз, холос. Боиси, Mi Mix 2 жиҳатларига кўра имкониятни Xiaomi Mi6 флагманига бой беради. Ваҳоланки, бу девайс юртимизда 3 279 000 сўмдан бошлаб сотилмоқда.

Xiaomi компаниясининг кичик флагманига ўрнатилган экран аниқ ва равшанлик борасида яққол устун. Унинг камераси ҳам сифатли ҳамда корпуси сувдан ҳимоя қилинган. Шунингдек, Xiaomi Mi6 қуввати узоққа етади. Mi Mix 2 моделининг қайрилма экрани эса харидорнинг кўзини шамғалат қилади ва камчиликларни бекитади.

Xiaomi Mi5s Plus — арзон ва Redmi Note 5 Pro'дан яхши

Xiaomi Redmi Note 5 Pro келиши билан Тошкент смартфон бозорларида жуда тез сотилди. Хитойнинг ўзида бу смартфон 218 АҚШ долларидан (4/64 ГБ) бошлаб, 265 АҚШ долларигача (6/64 ГБ) сотилаётган бўлса, «Малика» техномаркази дўконларида Redmi Note 5 Pro модели учун нақ 2 725 000 сўм сўрашмоқда, бу эса тахминан 330 АҚШ доллари, дегани!

300 АҚШ долларига эса Mi5s Plus моделини харид қилиш мумкин. Ундаги Snapdragon 821 процессори 2016 йилда энг кучли ҳисобланган ва бугун ҳам самарадорликда анча илғор. Айниқса, ўйинларни ўйнашни хуш кўрувчилар учун айни муддао.

Қолаверса, Mi5s Plus моделини Quick Charge 3.0 орқали тезкор қувватлаш мумкин. Redmi Note 5 Pro модели эса бир оз эскироқ ҳисобланган Quick Charge 2.0 қувватлаш технологиясига эга бўлган. Mi5s Plus NFC модулига эга бўлган. Mi5s Plus бош камераси яхши сурат олишда ўзининг "иниси"дан қолишмайди. Уларнинг ҳар иккаласи кундуз куни яхши сурат олади.

Redmi Note 5 Pro бир оз қайрилма, замонавий ўлчамли ва кенг, шунингдек ёрқин экрани билан устун.

Ўқинг: P20 ва P20 Pro савдода рекорд ўрнатди