Xiaomi’нинг яна бир – Cactus номли янги смартфони Geekbench’да «кўринди»
Кейинги пайтларда кетма-кет турли моделларда смартфонлар тақдим этаётган Xiaomi корпорациясининг яна битта мобил қурилма тайёрлаётгани аниқланди. Ўзи куни кеча бу смартфонсознинг битта янги моделдаги телефони ҳақида хабар чиққанди.
ЎҚИНГ: Xiaomi Valentino – сирли Snapdragon процессорига эга яна бир смартфон бенчмаркда «қўлга тушди»
Xiaomi’нинг навбатдаги смартфони Geekbench сервисида «Cactus» кодли номи билан тестдан ўтказилган. Қизиғи шундаки, хитойлик смартфонсоз ўзининг Cactus модели учун MediaTek процессорини танлаган.
Geekbench маълумотларига қараганда, Xiaomi Cactus смартфони 2 Ггц.лик такт частотасида ишловчи тўрт ядроли MediaTek P40 чипига таянади. У икки гигабайтлик тезкор хотира билан, Android 8.1 Oreo операцион тизим талқини бошқаруви остида ишлайди.
Гувоҳи бўлиб турганингиздек, MediaTek процессори базасидаги смартфон якка ядроли тестда 802 балл, кўп ядроли синовда эса 2334 балл тўплай олган.
Афтидан, бу телефонга MIUI 9 прошивкаси ўрнатилса керак, аммо бу ҳали аниқ эмас. Техник хусусиятлари нисбатан пастроқ эканини инобатга олсак, унга «тоза» Android тизими ўрнатилиши ҳам мумкин. Шунга яраша, Xiaomi Cactus смартфони ҳамёнбоп бўлиши ва асосан ривожланаётган бозорлар, масалан – Ҳиндистон учун мўлжалланиши кутилаётир.
Афсуски, Xiaomi Cactus ҳақида ҳозирча шулардан бошқа ҳеч нима маълум эмас. Аммо «хитойча Apple»нинг бозорга чиқарилган турли моделлардаги кўплаб смартфонлари ва бошқа девайслари ўзимизда ҳам сотилмоқда.
