Xiaomi расмий сайтига кутилмаганда энг арзон Redmi 9A смартфони ва Mi Band 4C смарт-трекери чиқди!

Xiaomi корпорацияси бу йилги энг арзон смартфони – Redmi 9A моделини ҳам тайёрлаганлиги ҳақида ёзганмиз. Компаниянинг сайтида бугун шу телефон ҳамда яна бир девайс пайдо бўлиб қолган, кейин яна яшириб қўйишган.

ЎҚИНГ: Хитойда сотувга чиқаётган Redmi 9 модели айни шу смартфоннинг глобал версиясидан қандай фарқ қилади?

Расмий сайтга тасодифан (балки атайлабдир) чиқарилган маълумотларга кўра, Redmi 9A диагоналига 6,53 дюймлик, HD+ форматли, томчисимон кемтикли экранга эга. Унинг аппарат таъминоти асосида яп-янги – MediaTek ҳали расман тақдим этиб ҳам улгурмаган Helio G25 процессори ётади. Бу чипсет 2.0 гигагерцлик такт частотасида ишловчи саккизта ядрони ўз ичига олади.

Redmi 9A бош камераси 13, олд камераси эса 5 мегапикселлик эканлиги, аккумулятор ток сиғими 5000 мА/соатни ташкил этиши ҳам ёзилган. Лекин ушбу маълумотлар билан бирга намойиш қилинган расм Redmi 8A моделига тегишли, шу боисдан барчаси қанақадир шубҳали.

ЎҚИНГ: Redmi K40 ҳам аллақачон интернетда «кўрина» бошлади

Арзон смартфондан ташқари, Xiaomi сайтида яна бир бўлажак бестселлер – Mi Band 4C ақлли билагузуги хусусиятлари ҳам расми билан бирга эълон қилинган. Эсингизда бўлса, унинг Mi Band 5 билан бирга намойиш этилиши айтилган, аммо тақдимот рўйхатида у бўлмаган эди.

Шундай қилиб, Mi Band 4C модели диагоналига 1,08 дюймлик LCD-дисплей билан таъминланган, унинг устига 2.5D ҳимоя шишаси қопланган. Фитнес-браслет сувдан ҳимояга (5 ATM) эга, боғланиш учун Bluetooth 5.0 қўллайди ва автономлиги 14 кунга боради.

ЎҚИНГ: Mi Band 5 олмай туринг – янада арзон Mi Band 5 Lite ва кучли Mi Band 5 Pro ҳам чиқади!