Xiaomi Redmi Note 9T қачон тақдим қилиниши айтилди
Ўтган йилнинг охирида Redmi Note 9T номли смартфон ҳақида миш-мишлар тарқалганди. Янги йил бошида эса бу қурилманинг тақдимот санаси маълум бўлди.
Компаниянинг Испаниядаги офиси янги смартфон 8 январь куни Лондон вақти билан кундузги 10 да (Тошкент вақти билан эса 15 да) тақдим қилинишини айтиб, Twitter'да эълон қолдирди, лекин твит орадан кўп ўтмай ўчириб ташланди.
Орадан бир неча дақиқа ўтгач, бошқа Xiaomi офислари ҳам тақдимот санасини тасдиқлади. Аммо бу сафар тақдимот Лондон вақти билан кундузги 12 (Тошкент вақти билан 17) да деб кўрсатилди.
Xiaomi Redmi Note 9T'нинг асосий жиҳати унинг 5G'да ишлашидир. Смартфон аллақачон Geekbench'да Mediatek'нинг Dimensity 800U чипи билан синовдан ўтган. «Оперативка»си 4ГБ бўлган қурилма қадоқдан Android 10'да ишлайди.
Реклама эълонидан кўриниб турган яна бир жиҳат шуки, қурилма орео шаклидаги камера модулига эга бўлади. Redmi Note 9 Pro 5G'да ҳам айни камера дизайнидан фойдаланилганди. Бироқ Note 9T фақат учта камера билан жиҳозланади.
Демак, янги Xiaomi Redmi Note 9T смартфони 8 январь куни Тошкент вақти билан 17:00 да тақдим қилинади. Тафсилотларни биз билан кузатишда давом этинг.
ЎҚИНГ: Snapdragon 888 процессорли энг арзон флагман – Redmi K40 Pro илк суратда!
