Xiaomi смартфонлари: туркум ва моделларнинг фарқини биласизми?

Xiaomi смартфонлари: туркум ва моделларнинг фарқини биласизми?

Ҳеч бўлмаганда кунора бирор смартфон тақдимотига гувоҳ бўляпмиз. Компаниялар янги смартфонига гўё ном ҳам танлашга вақтлари йўқдек уларни бир-бирига ўхшаш номлар ёки туркумларни ҳарфлар билан номлашни канда қилишаётгани йўқ. Мисол учун, бу борада пешқадам бўлган Samsung’нинг Core, Grand, Star, On, J каби смартфон туркумларини айтиш мумкин.

Қисқа бўлса ҳам, муваффақиятли фаолият даврида Xiaomi ўз ишқибозларига тақдим этаётган смартфонларнинг кети узилаётгани йўқ. Уларни бир-биридан ажратишда, харид чоғида чалкашлик ва тушунмовчиликлар юзага келмоқда.

Фаолиятини 2010 йилда Android учун MIUI мослаштирилган операцион тизими ишлаб чиқаришдан бошлаган компания бугунга қадар 8 туркум ва бир қанча талқиндаги  смартфон тақдим этишга улгурди.

Илк смартфон 2011 йилда ишлаб чиқарила бошланган. Айни пайтда ишлаб чиқарувчи фойдаланувчиларга смартфон, планшет, ноутбукдан тортиб, “ақлли кийимгача” бўлган кўп турдаги маҳсулотларни танлаш имконини бермоқда.

Халқаро смартфон бозорида етакчилик қилаётган энг яхши гаджетлар рўйхатида компаниянинг Xiaomi Redmi Note 3, Mi5 каби илғор мобиль алоқа воситаларини ҳам учратиш мумкин.  Қуйида компаниянинг асосий маҳсулоти — смартфонларига тўхталиб ўтмоқчимиз. Уларни иккита асосий туркумга бўлиш мумкин: Mi ва Redmi туркумлари.

Mi-One

Mi туркумидаги смартфонлар

Mi туркуми компаниянинг Хитой бозоридаги илк “имзо”си бўлган. Xiaomi биринчи бўлиб Mi-One смартфони ва унинг бир нечта талқинларини намойиш этган. Мазкур туркум бугунга қадар ишлаб чиқарилмоқда ва у компаниянинг асосий флагман гаджети ҳисобланади. Унда одатда юқори самарадорликка эга Qualcomm Snapdragon процессори жорий этилади. Бугунга келиб мазкур туркумга хос бўлган 3 турдаги смартфон ишлаб чиқарилмоқда.

Mi модели

Бу ном остидаги флагман смартфонлар кучли жиҳатлари, ихчам экран билан ажралиб туради. Аввалги Xiaomi Mi4 флагмани 5 дюйм катталикдаги экранга эга бўлган бўлса, сўнгги Mi5 мобиль телефон аппарати 5.15 дюймли.

Xiaomi компанияси Mi4 гаджети шарофати билан 2014 йилнинг илк чорагида жаҳоннинг 3-рақамли смартфон ишлаб чиқарувчисига айланган эди. Айнан шу смартфон жаҳоннинг энг инновацион мобиль воситалари рўйхатига кирди.

Mi5

AnTuTu бенчмаркида Xiaomi Mi 5 самарадорлик бўйича Apple’нинг iPhone 6s Plus’дан ҳам, Galaxy S7’дан ҳам юқори натижа қайд этган. У билан бирга унинг “Pro” модели ҳам тақдим қилинган. Snapdragon 820 процессор, Adreno 530 видеокарта, 3 ёки 4 ГБ оператив хотира, 32, 64 ёки 128 ГБ доимий ички хотира, 5.15 дюймли 1080p сиғимли илғор экран, махсус барқарорлаштириш тизимига эга 16 МП бош камера, Android 6.0 Marshmallow операцион тизимининг MIUI 7 талқини билан таъминланган Mi5 смартфони юртимиз смартфон бозорида 300 АҚШ долларидан сотилмоқда.

Xiaomi Mi5: мукаммаллик ва ҳашам касб этган ҳамёнбоп флагман

Компания томонидан Mi моделидаги бир қанча муваффақиятли флагманлар тақдим этилди. Мисол учун, Mi4 моделининг Mi4i, Mi4c, Mi4S талқинлари, шунингдек Mi4 гаджетининг Windows Mobile операцион тизими бошқарувидаги версияси.

Xiaomi Mi Note

Mi Note

2015 йилнинг январида компания смартфонлари хилини кўпайтириш ва фойдаланувчилар аудиториясини кенгайтириш мақсадида Mi Note ва Mi Note Pro фаблетларини намойиш этди. Ушбу қурилмалар Xiaomi “ижоди”га мансуб илк катта – 5.7 дюйм экранли смартфонлар бўлишди.  Xiaomi Mi Note фаблети Mi4 флагманининг катталаштирилган ва Qualcomm Snapdragon 801 процессори билан таъминланган талқини эди. Xiaomi Mi Note Pro флагмани эса Qualcomm Snapdragon 810 ҳамда QHD сиғимли дисплей билан таъминланган чинакам “байроқдор” фаблет бўлди. Аммо, Snapdragon 810 процессоридаги носозликлар сабабли смартфон фаолиятида “қотиб” қолишлар кўп кузатилган. Компания шу кунларда ушбу туркумни флагманча жиҳат ва йирик экранга эга Xiaomi Mi Note 2 смартфони билан бойитиш ҳаракатида.

Mi Max

Mi Max

Баъзилар учун смартфон экрани қанчалар катта бўлса, шунча яхши. Айниқса, экрани билан планшет билан беллаша оладиган смартфон ишқибозлари ҳам кўп. Xiaomi шуни инобатга олиб, ушбу синфга мансуб йирик, яъни 6.44 дюйм  экранли Xiaomi Mi Max’ни ишлаб чиқара бошлади. Смартфон флагманча ва бошқа кўплаб қизиқарли хусусиятларга эга.

2016 йилнинг июлида намойиш этилган Mi Max  Gorilla Glass 3 ҳимоя шишаси, 3 ГБ ёки 4 ГБ оператив ва 32/128 ГБ доимий хотира, Snapdragon 650 ёки янада кучли Snapdragon 652 процессори,

16 МП камера, 2 кунлик фаолиятга етадиган 4850 мА соат аккумулятор,  Android 6.0 Marshmallow’нинг MIUI 7 талқинига эга смартфон халқаро бозорда 220 АҚШ долларидан сотилмоқда.

Redmi

Redmi туркуми

Mi-One ҳамда Mi-Two смартфонларидан сўнг руҳланиб кетган Xiaomi янада кенг имкониятли смартфонлари билан бозорни “эгаллаш” мақсаддиа, 2013 йилнинг ёзида Xiaomi Redmi ( Hongmi ва Red Rice) мобиль алоқа воситасини намойиш қилди. Qualcomm процессорлари ўрнига MediaTek процессорларидан фойдаланилгани ва нарх-навонинг янада арзонлашгани ушбу моделнинг аввалги моделлардан фарқли жиҳатлари эди. Redmi’нинг MediaTek процессорли талқинидан кўра, аввалги талқини кўпроқ маъқукл бўлган эди. Бу Redmi туркумини ҳам иккита моделга бўлиш мумкин.

Redmi1

Redmi модели

Redmi смартфонлари — 4.7 – 5 дюймли экран ҳажмидан келиб чиқиб айтиш мумкинки, шартли равишда ихчам. Аввалига корпуси пластикдан тайёрланган бўлса ҳам, айни пайтда жуда бозорбоп бўлган Redmi 3 смартфонининг барча талқинлари металлдан тайёрланиб, бармоқ излари сканери билан ҳам таъминланган.

Redmi Note

Redmi Note

Номидан ҳам кўриниб турибдики, бу катта экранли флагман смартфон. Унинг илк модели 2014 йилда тақдим эитлган ва экрани 5.5 дюйм, 1280х720 пиксель сиғимли бўлган. Redmi Note Mediatek MT6592 процессори ҳамда поликарбонат корпус билан таъминланган эди. Айни пайтда сотилаётган  Redmi Note 3 эса металл корпус ва бармоқ излари сканерига эга илк модель бўлди. Фаблетнинг узоқ фаолияти учун сиғими 4000 мА соат бўлган аккумулятор масъул.

Ҳозирда смартфоннинг турли талқинлари ишлаб чиқарилмоқда. Жумладан, унинг Mediatek MT6795 Helio X10 ёки Qualcomm Snapdragon 650 процессорлари жорий қилинган, 2 ёки 3 ГБ оператив хотирага эга бўлган, 16 ёки 32 ГБ доимий ички хотира билан таъминланган версиялари мавжуд.

MiPad

MiPad

Ҳозирча Xiaomi компанияси ишлаб чиқарилган планшетлар у қадар кўп эмас: бу борада 2 та модель тақдим этилган. Илк планшет – MiPad 2014 йилдан ишлаб чиқарилган. Унинг экрани 7.9 дюйм ҳамда 2048 х 1536 пиксель сиғимли бўлган. Планшет 4 ядроли Nvidia Tegra K1 процессори ва пластик корпусга эга бўлган. MiPad 2 планшети эса 2015 йилнинг сўнггида намойиш этилган. Унинг формати аввалгиси каби, фақат корпуси металл хомашёсидан тайёрланган. Шунингдек, Nvidia “юрак” ўрнига янада кучли Intel Atom X5-Z8500 процессори ўрнатилган. Ушбу планшетнинг Android ҳамда Windows 10 операцион тизимлари бошқарувида фаолият кўрсатадиган талқинлари мавжуд.