Xiaomi янги смартфон тақдимотига таклиф қилмоқда
Яқиндагина Xiaomi Mi8 модели тақдим қилинган эди. Пешонасида iPhone X флагманидаги каби кесиғи бўлган мазкур янги хитойлик ҳар жиҳатдан илғор смартфон. Агар сизга ана шундай дизайндаги каби янада арзон смартфон маъқул келса, Xiaomi дизайнерлари сиз учун яна бир яхши совға тайёрлашмоқда. Бу -- Xiaomi Redmi 6!
Xiaomi Redmi 6 ҳамёнбоп смартфонлар орасида навбатдаги "ҳит" бўлиши ҳозирданоқ маълум қилинмоқда. Экран устидаги «қош-кўзи» билан ўзига хос девайснинг тақдимоти куни аниқ бўлди.
Компания айни пайтда ҳамкорларини 12 июнда бўлиб ўтадиган Xiaomi Redmi 6 модели тақдимотига таклиф қилмоқда. Эҳтимол, мазкур модел билан бирга, Redmi 6A ҳамда Redmi 6 Pro/Plus моделларини ҳам тақдим қилишни режалаштирган.
Хитойдаги коммуникация воситаларини рўйхатга олувчи TENAA давлат ташкилотидаги маълумотларга кўра, Xiaomi Redmi 6 модели учун 5,84 дюймли дисплей тайёрланган. Унинг пикселлар сиғими юқори -- 2280х1080 та белгига тенг. Шу билан бирга, экраннинг томонлар нисбати бугунги замон руҳида -- 19:9 ўлчамли.
Xiaomi Redmi 6 ҳамёнбоп смартфон саккиз ядроли, частота интервали 2,0 ГГц (балким Snapdragon 625) бўлган чипсет ўрнатилган. Смартфон уч хил модификацияда сотувга чиқарилади: 2/16 Гб, 3/32 Гб ҳамда 4/64 Гб. Доимий хотирани microSD бўлмачаси орқали катталаштириш мумкин, бироқ бунинг учун иккинчи SIM-картага мўлжалланган бўлмачадан воз кечиш керак бўлади.
Xiaomi Redmi 6 моделининг куч-қуввати учун ундаги ток сиғими 3900 мА соат бўлган аккумулятор масъул бўлган. Смартфондаги олд камера 5 мегапикселли, бош камера эса қўш сенсорли бўлади. Бош камеранинг Redmi Note 5 Pro даражасида сурат олиши айтилмоқда.
Маълумотларга қараганда, орқа панел металлдан тайёрланади, корпуснинг устки ва қуйи қисмлари эса пластик улоқлардан иборат бўлади.
Redmi 6 Pro модели эса орқа панелдаги бармоқ изи сканери билан фарқланиб туради. Шу билан бирга, мазкур моделда маиший электроника воситаларини бошқариш учун инфра-қизил узаткич, янги Wi-Fi 802.11 a/b/g/n (2.4 + 5 ГГц) ҳамда Bluetooth 5.0 модуллари мавжуд. Қолаверса, юоқри талқин аккумуляторининг электр токи сиғими 4000 мА·соат.
Смартфон ўлчамлари: 149,33 × 71,68 × 8,75 мм, вазни эса 178 грамм.
Смартфон 9 рангдаги корпусда ишлаб чиқарилади — қора, «оч пушти», тилла, оқ, кўк, қизил, пушти, кул ранг ҳамда кумуш ранг.
