Xiaomi'нинг энг чиройли смартфони iPhone 14 Pro тирқиш дизайнини кўчириб олди

Xiaomi'нинг энг чиройли смартфони iPhone 14 Pro тирқиш дизайнини кўчириб олди

Xiaomi кейинги ҳафта ўзининг Civi 2'ни тақдим қилишга тайёрланмоқда. Кеча компания ўзининг "энг чиройли" деб таъриф бериладиган смартфонининг орқа дизайнини намойиш қиладиган постерларни чиқарган эди. Бугун эса унинг олд томони ҳам кўрсатилди.

Бир қарашда Xiaomi Civi 2 олд томондан яқинда тақдим қилинган Apple'нинг iPhone 14 Pro смартфонларини эслатиб юборади, чунки у экран юқори марказида узунчоқ овал шаклидаги селфи камера тирқишига эга. Айтиш мумкинки, Xiaomi учун бошқа смартфонлар, айниқса, Apple смартфонлари дизайнини кўчириб олиш бегона эмас: компания бундан аввал ҳам iPhone Х тирқиш дизайнини Mi 8 учун Ctrl+C & Ctrl+V қилган эди. 

Маълум бўлишича, Xiaomi Civi 2 компания смартфонлари ичида энг кучли олд камера тизимига эга бўлади: тирқиш ичида 32 мегапикселли иккита камера сенсорлари мавжуд бўлиб, улар юқори даражадаги селфилар олиш имконини беради. Орқа камерага келадиган бўлсак, учлик камераларининг асосий сенсор камера оролига ёзиб қўйилганидек, 50МП бўлади.  

Смартфон ён томонлари аввалги Civi смартфонларида бўлганидек "гиперболойд" дизайнда, яъни олд-орқа томон ёнлари ҳам эгилган. Қурилма, 7.23 мм қалинликда ва 171.8 грам оғирликда эканлиги айтилмоқда - бу ўтган йилги Xiaomi Civi'дан кўра қалинроқ ва оғирроқдир.

Тақдимот санасини эълон қилиш билан бирга, Xiaomi ўзининг янги авлод Civi смартфони учун олдиндан буюртма беришни ҳам очган эди. Таъкидлаш жоизки, бир кун ичида Civi 2 учун 100,000 дан ошиқ буюртмалар берилган.

Миш-мишларга қараганда Xiaomi Civi 2 глобал бозорга ҳам чиқарилиши мумкин.

ЎҚИНГ: OnePlus 11 Pro'нинг техник кўрсаткичлари ошкор бўлди