Xiaomi'нинг сирли автомобили технопаркда қўлга тушди!
Интернетда Хитой кўчаларида синовдан ўтказилаётган Xiaomi'нинг илк автомобили суратлари тарқалди. Улардан кўриш мумкинки, Хитойлик таниқли смартфон брендининг электромобили узун капот билан аеродинамик кузовга эга. Миш-мишларга кўра, у уч хил моделда чиқарилади ва улар Qualcomm 8295 чипсетига эга бўлади. Уларнинг бошланғич икки модели BYD томонидан ишлаб чиқарилган, 400 волтли зарядлаш билан мос келадиган Blade темир-фосфат батареяларини олса, учинчиси CATL'нинг атиги 15 дақиқада 0 дан 80% гача зарядланиш имконини берадиган 800 волтли Qilin батареяси билан жиҳозланади. Қўшимчасига айтиш керакки, Xiaomi, шунингдек, 2025 йилда чиқарилиши кутилаётган "Le Mans" код номли электромобил устида ҳам ишламоқда.
"Modena" код номига эга электромобил эса авваллари 150 дан 200 минг юангача (22 дан 29 минг долларгача) туради деб тахмин қилинган эди. Эндиликда бу 260-300 минг юангача (38-44 минг доллар) бўлиши мумкинлиги таҳмин қилинмоқда. Автомобил бу йил чиқмаслиги аниқ, бироқ, компания уни бу йилни ўзидаёқ тақдим қилиши ва олдиндан буюртмаларни қабул қилишни бошлаши мумкин. Кейинги йилдан эса оммавий ишлаб чиқариш ва етказиб бериш бошланиши кутилмоқда.
ЎҚИНГ: Tesla хатосини тан олди ва энди унинг электромобиллари стандарт руллар қайтади
