“Хитойча Apple” номли кучли гаджет тақдимоти кутилмоқда
Инсайдерлар томонидан тахминий суратлари эълон қилинган Xiaomi Mi 5s мобиль алоқа воситасига ҳозирданоқ “Хитойча Apple” деган лақаб берилмоқда.
Маълумотларга кўра, сентябрь ойида намойиш этилиши кутилаётган iPhone 7 Plus ёки iPhone 7 Pro каби мазкур гаджетнинг бош камераси ҳам 2 та объективдан иборат бўлади. Бу тахмин Xiaomi ҳамда Samsung Electro-Mechanics компаниялари ўртасида 2016 йилнинг июль ойида мазкур турдаги камераларни етказиб бериш тўғрисида тузилган шартномага асосланиб илгари сурилмоқда.
Xiaomi Mi 5s смартфони Xiaomi Mi5’нинг янада такомиллашган талқини бўлади ва илғор Snapdragon 820 ёки янада тезкор Snapdragon 821 процессорида фаолият кўрсатади.
Экспертларнинг фикрларига кўра, Xiaomi’нинг янги смартфони 5,5 дюймли, 2,5D-туридаги шишали Full HD-экранга эга бўлади. Смартфон дисплейида iPhone 6s каби 3D Touch, яъни чертиш даражасини аниқлаш технологияси татбиқ қилинади. Xiaomi Mi 5s “ақлли телефони” 6 ГБ оператив хотира ҳамда ультратовуш сканери, бармоқ излари сканери каби хавфсизликни таъминлаш тизимларига эга бўлади. Xiaomi Mi 5s корпуси металл, шиша ва керамика уйғунлигида тайёрланади.
Смартфон бозори мутахассислари мазкур талқиннинг айни пайтда сотилаётган Xiaomi Mi 5’дан тахминан 50 АҚШ доллари миқдорида қимматроқ сотилишини айтишмоқда.
Эслатиб ўтамиз, жорий йилнинг июнь ойи охирида 6 ГБ тезкор хотира, 2,15 ГГц частота тезлигида ишлайдиган, 64 битли Qualcomm Snapdragon 820, Adreno 530 график-тасвир процессорларига эга 5,15 дюймли Xiaomi Mi 5 гаджети Хитойдан ташқарида 370 АҚШ долларидан сотувга чиқарилди.
Смартфоннинг дисплей сиғими full-HD (1080×1920 пиксель). Гаджет Sony IMX298 русусмидаги фазали автофокус тизимига, LED фоточақноққа эга 16 МП бош камера билан таъминланган. Унинг олд камераси эса 4 МП ва суратни оптик барқарорлаштириш тизимига эга. Ҳар иккала камера диафрагмаси f/2.0, яъни жуда илғор.
Xiaomi Mi 5 мобиль телефони ўлчамлари: 144.5 x 69.2 x 7.25 мм, қурилма 129 грамм тош босади. Mi 5 қувват учун сиғими 3000 мА соат бўлган аккумулятор жавобгар. Унда Qualcomm Quick Charge 3.0. тезкор қувватлаш тизими татбиқ қилинган. Смартфон корпусида USB Type-C универсал порти ва қатор бошқа жиҳатлар, функциялар жорий этилган.
