Хитой бутун Ер юзини бепул интернет билан таъминлаш учун илк сунъий йўлдошни учирди
«Осмон ости салтанати» дея таърифланувчи мамлакат энди осмоннинг устини ҳам забт этишга жиддий киришган. Хитойликлар бутун дунёга бепул интернет етказиб бериш лойиҳасини ишлаб чиқишган.
ЎҚИНГ: Хитой 2026 йилгача ернинг барча аҳолисини бепул интернет билан таъминлайди
Куни кеча Long March-11 ташувчи ракетаси орбитага Hongyun-1 сунъий йўлдошини олиб чиқди. У интернетга бутун дунёдан киришни таъмилаш учун учириладиган 156 та паст орбитали йўлдошдан биринчисидир. Ушбу илк сунъий йўлдош кўп жиҳатдан тажрибавий аҳамиятга эга бўлиб, Хитой ҳали 2016 йилдаёқ бошлаган лойиҳа дастуридаги учар қурилмаларнинг имкониятларини текширишда ёрдам беради.
Режага кўра, сунъий йўлдошлар тармоғи Ерга яқин – минг километрдан паст бўлган орбитада қурилади. Хитойнинг давлат корпорацияси – CASIC (China Aerospace Science and Industry Corporation) ушбу тармоқнинг барча сунъий йўлдошларини 2022 йилгача учиришга бел боғлаган. Улар дастлаб Хитойни, кейин эса бутун дунёни тезкор ва барқарор интернет билан таъминлайди.
Бундан ташқари, ушбу мамлакатдаги LinkSure Network компанияси ҳам интернет тарқатувчи сунъий йўлдошлар тармоғини яратмоқчи эканлигини эълон қилган. У сайёрамизга яқин орбитага 270 та сунъий йўлдош учириб, бутун дунё аҳлига бепул интернет тарқатмоқчи.
