Хитойда "Арзон Galaxy S8" тақдим қилинди
Сўнгги пайтларда Samsung ҳамёнбоп ва ўрта нархли смартфон бозорида ўз ўрнини кескин йўқотиб бормоқда. Бунинг бош сабаби Хитойда яхши смартфонларни нисбатан арзон нархда ишлаб чиқараётган компаниялар эди. Шу боис, бу йил кореялик ишлаб чиқарувчи ўз сиёсатини бир оз ўзгартиришга қарор қилди.
Компания тарихида Galaxy S8 модели алоҳида ўринга эга. Қийин даврларда бу флагман компания нуфузини қайта тиклади. Шу сабабли, Samsung компанияси Galaxy S8 моделининг "Lite", яъни техник жиҳатдан бир оз қуйироқ, аммо кўринишидан мазкур моделни эслатадиган, шу билан бирга, анча арзон девайсни ишлаб чиқаришга қарор қилди.
Galaxy S Light Luxury моделининг ишчи номи "SM-G8750" ва у бугун Хитойда расман тақдим қилинди.
Galaxy S Light Luxury жиҳатлари ҳамда нархлари
Смартфонга қарашингиз билан сиз кўз олдингизда Galaxy S8 моделини кўрасиз. 18.5:9 ўлчамли смартфон 5.8 дюймли "Infinity Display" билан таъминланган. Экраннинг пикселлар сиғими FHD+.
Galaxy S Light Luxury учун 8 мегапикселли олд ҳамда 16 мегапикселли бош камера тайёрланган. Орқа панелда бармоқ изи сканери мавжуд. Бироқ, бу гал компания унинг ёнига юрак уришини ўлчайдиган сенсорни ўрнатмаган.
Galaxy S Light Luxury корпуси ҳам IP68 стандарти бўйича сув ҳамда чангдан ҳимоя қилинган. Корпусда овозли ёрдамчи тизимни чақириш учун Bixby тугмаси ҳам бор.
Қўшимча жиҳатлар қаторида смартфоннинг 4G LTE алоқа тармоғини қўллаб-қувватлашини айтиш мумкин. Шу билан бирга, смартфонда Samsung Pay тўлов тизими, симсиз қувватлаш ҳамда кўзнинг рангдор пардасини сканерлаш орқали тизимни очиш ҳамда қиёфани таниш каби функциялар ҳам жорий қилинган.
Арзон талқин бўлгани боис, мазкур моделда кучли Snapdragon 835 процессори эмас, ундан 2-3 қадам орқада бўлган Snapdragon 660 чипсетини учратамиз. Шунингдек, тезкор хотира учун 4 гигабайтли, доимий хотира учун 64 гигабайтли хотира карталари танланган.
Аккумулятор сиғими 3,000 мА соат бўлган смартфон Android 8.0 Oreo операцион тизими бошқарувида фаолият кўрсатади.
Galaxy S Light Luxury модели "арзон" дейилгани билан унча-мунча харидорни "қочириб юборади". Унинг Хитойдаги баҳоси $625 доллар, яъни асл Galaxy S8 моделидан анча арзон.
Galaxy S8 ҳамда S8 Plus 2017 йилнинг 21 апрелидан сотувга чиққан эди ва 799 ҳамда 899 АҚШ долларига баҳоланган. Юртимиз смартфон бозорида 2017 йилнинг 10 майидан бошлаб бу гаджетлар 5.7 ҳамда 6.7 миллион сўмдан сотилган. Айни пайтда эса Samsung Galaxy S8 моделининг юртимиздаги баҳоси 4 469 000 сўмга тушган.
Galaxy S Light Luxury моделига биринчи июнга қадар олдиндан буюртма беришга улгурганлар уни $578 доллардан бошлаб сотиб олишга муваффақ бўлади.
Galaxy S Light Luxury смартфони "Burgundy Red" (тўқ қизил) ҳамда Midnight Black (тим қора) рангли корпусларда ишлаб чиқарилади. Смартфонга қўшиб машҳур AKG брендининг аудио қулоқчинлари ҳам тақдим қилинади. Бепул бериладиган бу қулоқчиннинг бозордаги баҳоси 100 АҚШ долларидан зиёд. Galaxy S8 қадоғида ҳам бундай ёқимли қулоқчин бўлган.
