Хитойда Snapdragon 845'га эга илк смартфон тақдим қилинди
Хитойнинг етакчи смартфонсозларидан бўлган Vivo бренди ўз уйида Vivo APEX номли мобил алоқа воситасини тақдим қилди. MWC 2018 анжуманида ҳам қисман намойиш қилинган смартфон олд панелининг 98 фоизи экрандан иборат. Шу билан бирга, смартфон бортида айни пайтда энг кучли процессор ҳисобланган Snapdragon 845 чипсети мавжуд. Қолаверса, Vivo APEX'даги кучли олд камера эгасини таассуротли селфилар билан хурсанд қилади.
Vivo APEX телефонининг 5.99 дюймли OLED дисплейи "COF" технологияси бўйича ишлаб чиқарилган. Олд панелни тўлиқ экранга бўшатиб бериш учун айрим сенсорлар дисплей остига жойлаштирилган. Динамик ва суҳбат микрофони қуйида жойлашгани туфайли экран сезиларли даражада катталашган.
Олд камера эса юқори қиррада яширинган ва керак вазиятда уни ишга тушириш, ҳаракатлантириш мумкин.
Vivo APEX флагманидаги бармоқ изи сканери виртуал, яъни экранга жойлаштирилган. Унга бир нечта бармоқ изларини жорий қилиш мумкин.
Экрандаги чап ва ён томон ҳошияларининг қалинлиги 1.8 мм, қуйи ҳошия эса 4.3 мм. Корпус қалинлиги эса кўнгилдагидек -- 7.8 мм.
Vivo APEX моделида System in Package (SIP) технологияси ўрнатилган, яъни унда бир нечта, жумладан овозни қайта ишлайдиган Hi-Fi процессори ва бошқа чипсетлар ҳам мавжуд.
Смартфон бош камераси Super HDR технологиясини қўллаб-қувватлайди. Камера бир нечта суратлар олиб, сўнг уларни яхлитлайди.
Vivo ҳозирча смартфонга хос бошқа жиҳатларни эълон қилгани йўқ. Инсайдерларнинг ёзишларича, Vivo APEX тахминан $1000 доллардан сотувга чиқарилади.
