Хитойлик миллиардер Жек Ма биткоин ҳақида фикрини айтди

Хитойлик миллиардер Жек Ма биткоин ҳақида фикрини айтди

Хитойлик бизнес магнати Жек Ма бугун ҳамманинг оғзига тушган биткоин криптовалютаси ҳақида тўхталиб, ҳеч қачон бу "виртуал олтин"га қизиқиш билдирмаганини маълум қилди. Бироқ, унинг компанияси назарий жиҳатдан криптовалюта асоси ҳисобланган блокчейн ривожи учун салмоқли маблағ сарфламоқда.

CNBC телеканали билан суҳбатда Alibaba асосчиси ва Хитойнинг энг бой кишиси яқинда Хитойда бўлиб ўтган Жаҳон Интернет Конференциясида ҳам ундан биткоин хусусида кўп маротаба сўрашганини айтади.

"Тўғрисини айтдим, мен биткоин тўғрисида жуда кам биламан ва бу тизимни яхши тушунмайман", дейди жаноб Ma.

$38.6 млрд доллар бойликка эгалик қилувчи миллиардернинг фикрича, рақамли валюта тизими жаҳоннинг иқтисодий қиёфасини, жумладан халқаро савдо-сотиқ ва молиявий қоидаларни тубдан ўзгартириб юборишга қодир кучга эга. Alibaba пул тикаётган блокчейн технологияси эса бугунги иқтисодий тартибларга амал қилади. Жумладан, компаниянинг бу йўналишдаги ташаббуслари одамлар соғлигини ҳимоя қилиш ҳамда ноқонуний савдо-сотиқни олдини олишга қаратилган.

"Биз виртуал валютага ҳали тайёр эмасмиз. Бу восита ҳозирча коррупция ва жиноят учун айни муддао. Мен бор диққатимни AliPay мобил тўлов тизимига қаратганман. Биткоин эса мен учун эмас. Биз Хитойда нақдсиз савдо-сотиқни ривожлантиришга ҳаракат қиляпмиз. Сабаби, бу жамият ривожи учун самарали, очиқ-ошкораликни таъминлайдиган ва коррупцияга йўл қўймайдиган тизим".

Айтиш жоизки, сўнгги вақтларда биткоин валютасига қизиқиш кескин ошиб бормоқда. Уни харид қилиш истагидаги минглаб америкаликлар ўз уй-жойларини ҳам гаровга қўйишдан қайтишмаяпти.

Биткоин криптовалютаси–бу ишончга эмас, балки криптографик кодлаш тизимига асосланган, ўзаро ҳеч қандай воситачиларсиз (банк ёки бошқа молиявий инструментлар) тўловларни бевосита иштирокчилар ўртасида амалга оширилишини таъминловчи тўлов тизими валютасидир. Бунда назорат қилувчи органларсиз, тангаларнинг ҳақиқийлиги мураккаб математик алгоритмлар асосида тасдиқланадиган тизим амал қилган ҳолда иштирокчиларнинг ҳар бири ушбу тангаларни эмиссия қилиши ҳам мумкин.

Хабарларни тез ва осон ўқиш учун Андроид иловамизни сақлаб олинг.